ЯҢАЛЫКЛАР
2015 нче елның 8 нче апрелендә Мамадыш районы ГХАТ бүлегендә туу турында 100 нче актлар язмасы теркәлде. Елның 100 нче таныклык иясе - Мамадыш шәһәренең яңа гражданы Сәмирә Нугуманова.
Быелның беренче кварталы нәтиҗәләре буенча Мамадыш районы сөт җитештерү күләме ягыннан республикада лидерлар исемлегендә кала. Барлыгы 13,2 мең тонна продукция савып алынган. Әлеге мәгълүматларны Татарстанның Хөкүмәт йортында узган атналык киңәшмәдә җиткерделәр. Биредә шулай ук капиталь ремонт һәм төзелеш программаларының тормышка ашырылу дәрәҗәсе анализланды.
Шәһәребезнең хезмәт коллективлары арасында үткәрелгән “Җиңүле май“ смотр-конкурсының нәтиҗәләре игълан ителәчәк дата билгеле булды.
Республиканың барлык эре кибетләрендә һәм базарларында планнан тыш тикшерүләр алып барыла. Мамадыш базары да әлеге исемлеккә кергән. Исегезгә төшерәбез, башкалабыз Казанда “Адмирал“ сәүдә үзәге янып, анда 17 кеше һәлак булганнан соң, прокуратура Татарстанның 239 объектын тикшерү бурычын куйган иде. Республика прокуроры Илдус Нәфыйков гадәттән тыш хәлләр бүлегенә сату урыннарында янгын куркынычсызлыгы кагыйдәләренең үтәлешен тикшерергә боерган. Бу турыда район җитәкчелеге өчен үткәрелгән эшлекле дүшәмбе киңәшмәсендә җиткерделәр.
Медицина хезмәткәрләре башка төбәкләрдән килгән коллегалары белән бил алыша. “Олимп“ спорт-сәламәтләндерү комплексында әлеге тармакта эшләүчеләр арасында спартакиада үтте. Ак халатлылар барлыгы 6 төр буенча көч сынаштылар.
Авыл хуҗалыгы ярминкәләре республиканың шәһәр һәм район үзәкләрендә 1нче майга кадәр үткәреләчәк. Мондый бурычны Татарстан премьер-министры Илдар Халиков куйды. Хөкүмәт җитәкчесе әйтүенчә, кризис чорында әлеге чараларның әһәмияте аеруча зур. Билгеле булганча, ярминкәләрдә күп кенә продукциягә бәя бермә-бер түбәнрәк куела.
Мамадыш районы ГХАТ бүлегендә 3 нче апрель көнне Исламовлар гаиләсе яңа туган сабыйларына тантаналы төстә беренче документын алдылар. Ата-ана балага сирәк очрый торган гадәти булмаган Вилназ исеме сайлаганнар.
Түбән Ушмы авыл җирлегендә 2 Бөек Ватан сугышы ветераны һәм 39 тыл ветераны яши. Бу атнада Түбән Ушмы мәдәният йортында ветераннарга юбилей медале бирү тантанасы уздырылды.
1945 елның 9нчы мае кояшлы, матур көн булып истә калган. Ул чакта миңа өч яшь иде. Без әни белән урамда йөри идек. Шул вакытта ул миңа: “Сугыш беткән. Кайберләрнең әтиләре кайтыр, ә синең әтиең кайтмас инде,“–диде.