Мамадыш муниципаль районы

Лениногорскида республика ЗАГС идарәсе коллегиясе үтте.

2015 елның 23 октябре, җомга

Соңгы тугыз ай нәтиҗәсе буенча Татарстанда бишенче ел рәттән үлүчеләргә караганда туучыларның артуы күзәтелә, тик бу барлык районнарда да түгел. Бу хакта бездә узган Министрлар Кабинеты ЗАГС идарәсенең коллегия утырышында сөйләштеләр.

Ул көнне шәһәрдәге яңа төзелгән Язылышучылар сарае тантаналы көннән дә ким түгел иде. Биредә катнашучы: Министрлар Кабинеты Аппараты вәкилләре, республика муниципаль район ЗАГС начальниклары, җирле үзидарә органнары вәкилләре яңа бинага сокланып, күпчелеге хатын-кыз булганлыктан, матур күлмәкләре белән үкчәле туфлиләрен киеп, керт-керт басып карап, танышып йөрделәр, фотога төштеләр.Утырышның бездә узуы да шуңа бәйле булгандыр, мөгаен. Коллегиядә катнашкан район башлыгы Рәгать Хөсәенов килгән кунакларга ЗАГС бинасының шулай тиз арада өлгергәненә үзенең дә ышанмавын әйтте. "Бу урын ныклы гаилә институтын үстереп җибәрергә этәргеч булыр дип уйлыйбыз", диде ул. Бинада яшьләр, өлкән сыйныф укучылары белән лекцияләр уздыру да аның хыялына кергән.

Коллегия ахырында муниңипалә районнарның авыл җирлегендә граҗданлык хәле актларын теркәү өлкәсендә уңышлы эшләүчеләрне бүләкләделәр. Бүләкләнүчеләр арасында безнең район вәкилләре дә бар. Федотовка авыл җирлеге башлыгы урынбасары Любовь Степанова Министрлар Кабинеты ЗАГС идарәсеннән үз эшенә бирелгәнлек һәм югары профессионализм өчен Мактау грамотасы белән бүләкләнде. Ул 19 ел җирле үзидарәдә хезмәт куя. Авылда быел язылышучылар булмаган икән. Ә менә Яңа Иштирәк җирлеге башлыгы урынбасары Фирдәвес Могыйнова быел 18 мартта авылда Марс Җамалиев икенче никахын Гөлфизә Ахиярова белән теркәде, ди. Туганнар, дуслар белән бергә җирле үзидарәдә язылышканнар. "Ел дәвамында әлегә кадәр өч бала туды, аларны теркәп куйдык", ди 15 елга якын эшләүче Фирдәвес Әсхәтовна. Аңа ЗАГС идарәсеннән күпьеллык намуслы эшләве өчен Рәхмәт хаты тапшырылды.

БАРЛЫК ЯҢАЛЫКЛАРНЫ УКУ