Мамадыш муниципаль районы

Кемнәр юл–транспорт һәлакәтенә ешрак юлыга һәм бу автомәктәпләргә ничек тәэсир итәргә мөмкин?

2014 елның 17 ноябре, дүшәмбе

Кемнәр юл–транспорт һәлакәтенә ешрак юлыга һәм бу автомәктәпләргә ничек тәэсир итәргә мөмкин? Бу турыда ЮХИДИнең пропаганда инспекторы Рамил Шиһапов сөйләде. Бу көннәрдә ул шәһәрдәге автомәктәпләрнең берсенә, анда белем алучылар белән очрашуга килгән иде.

Илдәге юл–транспорт һәлакәтләре статистикасы бер дә куанырлык түгел. Татарстан республикасы да искәрмә була алмый. Быелның тугыз аенда гына да җөмһүриятебез юлларында балалар катнашында 478 күңелсез хәл искәртелгән. Аларда 12 сабыйның гомерләре өзелә. Районыбыз буенча алганда, ел башыннан балалар катнашында 13 юл–транспорт һәлакәте теркәлде, 1 очрак үлем белән төгәлләнә.

ЮХИДИ пропаганда инспекторы Рамил Шиһапов белдерүенчә, күп кенә һәлакәтләр машина йөртү тәҗрибәсе 3 елдан кимрәк булган автомобильчеләр катнашында туа. Әлеге аңлату дәресләре шушы вәзгыятьтән чыгып оештырыла да инде.

Инспектор әйтүенчә, кагыйдәләрне белү генә аз, аларны төгәл үтәргә дә кирәк. Барлык йөртүчеләр дә таләпләргә намус белән караса, күңелсез очраклар да бермә–бер кимер иде. Гаеплеләрнең битараф булуы сәбәпле, пассажирлар, башка юлчылар, аларның якыннары зыян күрә.

"Тәҗрибә күрсәткәнчә, юл–транспорт һәлакәтләренең күпчелеге машина йөртү стажы 3 елга тулмаган автомобильчеләр катнашында туа. Авмомәктәпләрдә узучы мондый очрашуларны юкка гына үткәрмибез. Кешеләр юл йөрү кагыйдәләренең мөһимлеген аңласын иде",– ди Рамил Шиһапов.

Очрашуда әйтүләренчә, яңа канун буенча укучылары һәлакәтләргә еш юлыгучы автомәктәпләрне лицензияләреннән мәхрүм итәчәкләр.

БАРЛЫК ЯҢАЛЫКЛАРНЫ УКУ