Менюлар сайтка урнаштырылачак

Мәктәп менюларын белем бирү учреждениеләренең сайтларына урнаштырачаклар. Бу ата-аналарга көн саен пешекчеләрнең тәкъдимнәрен карап барырга мөмкинлек бирәчәк. Әлеге идеяны район башкарма комитеты җитәкчесе Илнар Хафизов җиткерде. 

Шәһәрнең икенче санлы лицеенда узган киңәшмә мәктәпләрдә укучыларны тукландыруны оештыруга багышланды. Эшлекле чарага рәислек иткән район башкарма комитеты җитәкчесе ассызыклавынча, белем бирүне оештыру акыллы балаларны тәрбияләүне генә түгел, аларның сәламәтлекләрен дә күз уңында тотарга тиеш.

–Бүгенге буын киеренке шартларда яши. Дәресләрдән соң балалар түгәрәкләргә, спорт секцияләренә ашыгалар. Аларның кайберләренең графиклары өйгә кереп тамак ялгап алырга да вакыт калдырмый торган итеп төзелгән. Ата-аналарның вакытында ашарга өлгертеп җиткермәүләрен дә танырга кирәк. Менә шуңа күрә дә мәктәптәге ашау тәмле дә, шул ук вакытта файдалы да булырга тиеш, – диде Илнар Хафизов.

Мәктәптә бүген ашату балансланган ике ике атналык менюга нигезләнгән. Дөрес, аш яисә ботка пешекченең генә осталыгына бәйле булмаска мөмкин. Беренче чирек тәмамланып килә, әмма кайбер белем бирү учреждениеләренең директорлары һаман да взнослар җыю буенча әти-әниләр белән уртак тел таба алмаганнар.

–Аңлагыз, бу мәҗбүриләп акча җыю түгел, без моңа кискен каршы. Ата-аналардан взнослар законлы нигездә җыела. Алардан җыелган суммага, ул күп очракта 200 сумга тигез, җирле бюджеттан дотация һәм мәктәпләрнең бизнес-планнары нигезендә эшләп алган акча да өстәлә, – диде Илнар Хафизов.

Киңәшмәдә аутсайдерлар рәтендә йөргәннәрне урыннарыннан да бастырдылар. Алар киләчәктә аерым контрольдә булачак. Кемнедер начар уңыш алган өчен тәнкыйтьләсәләр, икенче берәүләргә ата-аналар белән уртак тел таба алмаганнары өчен “эләкте“.

Әлеге чарада ике мәртәбә тукландыру мәсьәләсе дә күтәрелде. Районыбызның белем бирү учреждениеләренә ул әлегә авырлык белән генә кертелә. 2008нче елда кабул ителгән, мәктәптә туклануны көйләүче нормалар буенча, беренче ашау белән икенчесе арасындагы вакыт 4 сәгатьтән артмаска тиеш. Дөрес, ата-аналар әлеге чараларның кирәклеген инкарь итмәделәр. Бәхәсләр оештыруга кагылышлы иде. Авыл мәктәпләрендә ике мәртәбә ашаталар, шәһәрдәге белем бирү учреждениеләрендә 400дән артык баланы икенче тапкыр ничек тукландырырга икән дип баш ваталар. Илнар Хафизов идеядан баш тартырга кирәкмәслеген, әлеге проблеманы уңай хәл итүнең юллары табылачагын ассызыклап үтте. 

–Минем балам йокларга ярата, иртән чәй дә эчми, кайчагында өлгерми дә. Бар өмет – мәктәптә. Мин анда балама сәламәт ашау тәкъдим итәрләр дип уйлыйм. Үзебезнең кухняда аксымнар һәм углеводлар турында уйлыйбыз мыни без? Әлбәттә, юк. Мәктәптә исә бу мәсьәләдә катгый.

Киңәшмәдә сыйныфлар җитәкчеләренә дә катгый таләпләр куелды. Аларга ашатуны контрольгә алырга куштылар.