Россия Эчке эшләр министрлыгының Мамадыш районы бүлегендә матбугат киңәшмәсе узды

Мамадышлылар ирекле рәвештә аферистларга 35 мең сум акча биргән. Бу хакта Россия Эчке эшләр министрлыгының Мамадыш районы бүлеге җитәкчесе, полиция полковнигы Айрат Баһауов җирле ММЧ өчен үткәрелгән матбугат киңәшмәсендә хәбәр итте. Биредә социаль мошенниклык турында сөйләштеләр.

Чарада шулай ук “Таттелеком”, “Россия почтасы”, “Пенсия фонды”, халыкны социаль яклау органнары вәкилләре дә катнашты. Очрашу  мошенниклык кылу мәсьәләләренә багышланды. Районның баш полицейские искәртүенчә, хәзер җәмгыятьтә барыбыз өчен дә борчу тудыра торган проблемаларның берсе- мошенниклык, ягъни алдау юлы белән мөлкәтне үзләштерү тора. Еш кына очракта пенсионерлар, инвалидлар һәм балалар үзләре дә сизмәстән аларның корбанына әвереләләр. Мамадыш районында да берничә кеше мошенниклар тозагына эләккән, 4 очрак буенча җинаять эше кузгатылган. Килгән матди зыян 35 мең сум белән бәяләнә.

–Бүгенге көндә алдау юлы белән кеше мөлкәтен үзләштерү төрлечә кылына. Мошенниклар сезгә социаль хезмәткәр, медицина яисә хокук саклау хезмәткәре итеп танытып та килергә мөмкиннәр. Шулай ук телефон аша алдау фактлары ешайды. Телефоннан берәр якыныгыз авыр хәлдә, тиз генә акча кирәк, яки банкомат картагыз блокировать ителгән, кире төзәтү өчен сездән шәхесегез турында мәгълүмат сорарга мөмкиннәр, яки акча оттыгыз, шундый- шундый счетка салым буларак акча күчерегез, дигән СМС хәбәрләр килүе ихтимал,– диде Айрат Баһауов.

88 яшьлек пенсионер әби үз тарихын сөйләде. Берничә ай элек аның өенә чегәннәр килә. Үзләрен дәвалаучылар дип танытып, якташыбызның акчаларын үзләштерәләр. Бүген җинаять ачылган, гаеплеләргә җәза билгеләнгән, зыян күрүчегә акчаларын кире кайтарганнар. Әмма мондый үрнәк мисаллар сирәк очрый шул.

–Төрле тәкъдимнәр белән кире шалтыратуны сорап СМС хәбәр килсә, кире шалтыратырга ашыкмагыз, сезнең шалтырату нык югары бәядәге тариф белән булырга мөмкин, сезгә җавап та бирмәскә мөмкиннәр. Нәрсәләр булса да рекламалап алдан акча түләп куюны сораучы, социаль ярдәм күрсәтү оешмаларыннан дип таныштырып яки чегән милләтеннән нинди дә булса хезмәт өчен акча сорау фактларына юлыксагыз да  тиз арада безгә хәбәр итегез,– диде Айрат Баһауов.  

“Сак булыгыз – мошенниклар!“ профилактик акциясе 3нче ноябрьгә кадәр дәвам итәчәк.