Мамадыш яшьләре чишмә территориясен чистартты.

Мамадыш яшьләре чишмә территориясен чистартты. Әлеге изге чара “Чиста сулыклар-чиста намус“ девизы астында үтә. Эш барышын без дә күзәтеп кайттык.

“Яшь депутат мәктәбе“ проектында катнашучылар, яшьләр парламенты вәкилләре һәм “Президент белән бергә“ иҗтимагый хәрәкәте активистлары чираттагы өмәгә чыкты. Алар бу көнне “Чиста сулыклар-чиста намус“ девизы астында үткәрә. Эшче яшьләр көндәлек маршрутларын үзгәртеп, иртән иртүк офисларга түгел, ә чишмәгә юл тоттылар. Халыкара сулыкларны чистарту көненә багышланган экологик чара Тукай урамы башындагы “Ак чишмә“ территориясендә уза. Әлеге тереклек чыганагы күп кенә шәһәрдәшләребезнең яратып килә торган урыны, дип исәпләнелә. Өмәдә катнашучылар әйтүенчә, алар бу участокны каты көнкүреш калдыкларыннан, чүп үләннәреннән һәм кипкән яфраклардан чистартканнар. Эш күләме зур түгел, ди активистлар. Чөнки биредә хуҗа барлыгы күренеп тора. Акциядә катнашучылар искәртүенчә, киләчәктә аеруча мохтаҗ территорияләрдә эшләргә ниятлиләр. Проблемалар безне куркытмый,- дип белдерә алар.

Халык белән тагын да тыгызрак эшләү өчен яшьләр парламенты социаль челтәрдә үз төркемен булдырды. Активистлар хәрәкәтенә кушылырга һәм алар белән районның иҗтимагый тормышында катнашырга 100 артык кеше теләк белдергән.