Түбән Ушма авылы мәчетенә 110 яшь тула

Әлеге датаны зурлап билгеләп үтәчәкләр. Бу турыда район мөхтәсибәтеннән хәбәр итәләр. Шушы көннәрдә юбилей чараларына әзерлек максатыннан беренче киңәшмә дә үтте. 

“Алдыбызда олы бурыч тора. Бер гасырдан артык тарихы булган мәчет йөзен тапламыйча без аның 110 еллыгын билгеләп үтәргә тиешбез. Бәйрәм чарасына Казан каласыннан шәрәфле кунаклар да инде чакырулы”,- диде район мөхтәсибе Илһам хәзрәт Миннегалиев Т. Ушма мәхәлләсендә узган киңәшмәдә. 

ТР мөфтие Камил хәзрәт Сәмигуллин, Татарстанның баш казые Җәлил хәзрәт Фазлыев, ТР Дәүләт Советы депутаты Фәрит Мифтахов, «Татэнерго» ААҖнең генераль директоры Илшат Фәрдиев, күрше район мөхтәсибләре һәм башка бик күп кунаклар гасыр шаһиты булган мәчет белән генә түгел, данлыклы Т. Ушма авыл җирлеге белән дә якыннан таныша алачаклар.  Әлбәттә, район мөхтәсибәте әлеге киң масштаблы чараны оештыруда ярдәм сорап район хакимиятенә мөрәҗәгать итте. Дин әһелләре үтенеченә битараф калмаган район башлыгы Анатолий Иванов та әлеге изге эштән читтә калмаячагын белдерде. Корбан Гаете аенда узачак олугъ чарага кадәр бераз вакыт бар. Шул арада мәчеткә илтүче авыл урамнарын тәртипкә салырга чакырды ул. УПТК оешмасы тарафыннан авыл урамына асфальт түшәлер, дип ышандырды Анатолий Иванов. 

Җирлек башлыгы Рафаэл Муллаәхмәтовка әлеге урамдагы ташландык хәлгә килгән йортларны тәртипкә китерү вазыйфасы йөкләнде. Ә инде мәчеткә яңа сулыш өрергә Т. Ушма авыл җирлеге инвесторы Рифат Мотыйгуллин алыначак. Мәчетнең эчен төзекләндерү, тышын агарту, шомарту ише эшләр,истәлекле сувенирлар җитештерү аның ярдәме белән башкарылачак. 10 нчы октябрьдә узачак “Авыл көне” мәчет каршындагы чаралар белән башланып китәчәк, биредә мәчет тарихын чагылдыручы зур эскпозиция белән дә танышырга мөмкин булачак.  БВС кырында һәлак булганнар, ветераннар, тыл хезмәтчәннәре хөрмәтенә торгызылган һәйкәл ачылышы көтелә. Авылдашлар өчен аттракционнар, сәүдә рәтләре, кичен авыл мәдәният йортында бәйрәм концерты көтелә. Биредә исә Мингол Галиев, Ильяс Халиковның аһәңле тавышларын ишетергә мөмкин булачак.