Мамадыш муниципаль районы

Эшлекле дүшәмбе киңәшмәсе

2014 елның 3 июле, пәнҗешәмбе

Мәгариф тармагында җитәкчеләр алышынды

Районның берничә педагогик коллективлары алдагы уку елын яңа җитәкчеләр белән каршы алачак. Эшлекле дүшәмбе киңәшмәсендә кадрлар үзгәреше хакында хәбәр иттеләр. Чара Анатолий Иванов рәислегендә үтте.

Рәсми өлешкә кадәр тәбрикләү тантанасы. Тагын бер якташыбызга “Мамадыш районы каршындагы хезмәтләре өчен” медален тапшырдылар. Әлеге бүләккә иҗтимагый совет рәисе Хәлим Кәримов лаек булды.

Ә территориаль сайлау комиссиясе сәркатибе Рәшидә Филипповага партия эчендәге тавыш бирүләрне оештыру һәм үткәрү эшендә актив катнашканы өчен рәхмәт белдерелде.

Алга таба райондагы кадрлар үзгәреше белән таныштырдылар. Моңа кадәр мәгариф бүлеген җитәкләгән Артур Ефимов хезмәт юлын республиканың мәгариф һәм фән министрлыгында дәвам итәчәк. Ул ведомствоның бер тармагын җитәкләр дип көтелә. Аның урынына, районның баш педагогы итеп Рөстәм Гыйлаев билгеләнде. Ул беренче санлы мәктәп директоры буларак билгеле. Аннан бушаган кәнәфигә Җөри мәктәбе җитәкчесе Ришат Сәмигуллин килә. Җөри авылы белем бирү учреждениясе дилбегәсен Илсур Батыровка тапшырдылар.

Киңәшмәдә икенче санлы лицей директоры да билгеле булды. Әлеге вазыйфага Айрат Мәүлиевны тәкъдим иттеләр. Ул 87нче санлы ҺКтә директор урынбасары, Красная Горка мәктәбендә директор булып эшләгән иде.

Сөйләшү Украинадагы вакыйгаларга барып тоташты. Хәбәр итүләренчә, Мамадыш районы территориясенә качаклар кайтып урнаша башлаган. Алар арасында Лугансктан 7 табиб та бар. Күченеп кайтучылар үзәк хастаханәгә эшкә урнаштырылачак. Баш табиб Дамир Хаҗиев әйтүенчә, коллектив кайбер төр белгечләргә кытлык кичерә.

БАРЛЫК ЯҢАЛЫКЛАРНЫ УКУ