Мамадыш муниципаль районы

Быелгы Питрау бәйрәмендә “каз” почтасы эшләячәк

2014 елның 30 июне, дүшәмбе

Бу хакта Тырлау асты мәйданында узган киңәшмәдә хәбәр иттеләр. Эшлекле сөйләшү район башлыгы Анатолий Иванов рәислегендә үтте. Биредә фестивальне оештыру мәсьәләләре хакында фикерләштеләр.

Җөри авылы янәшәсендәге мәйданга “Питрау” бәйрәмен үткәрү буенча җаваплы булган оешма–предприятие вәкилләре килгән иде. Билгеле булганча, керәшен мәдәнияте республика фестивале быел 15нче мәртәбә оештырыла.

–Быел без барыбыз да яратып өлгергән бәйрәмебезнең кечкенә генә юбилеен үткәрәбез. Беренче Питрау әле дә истә. Ул чагында авыл бәйрәме генә иде. Ә хәзер зур масштаблы, республика әһәмиятендәге фестиваль булып үсте. Без аны тагын да югарырак дәрәҗәдә үткәрергә тиеш,– диде район башлыгы Анатолий Иванов.

Традиция буенча фольклор, балалар һәм эстрада сәхнәләре эшләячәк. Ат чабышлары, милли көрәш, һ.б. кызыклы уеннар, ярышлар, “Керәшен чибәре” конкурсы көтелә.

Шулай ук күп кенә яңалыклар да бар. Мәсәлән, мәйданга керү юлына яңа капкалар куелачак. Елга ярын киңәйтәчәкләр һәм анда катамараннар, ясалма аккошлар китерергә уйлыйлар.

Мәйданның бер читендә “Күкнең 7нче катында” дип исемләнгән утыргыч урнаштырылачак. Ул 2 метр биеклеккә куела һәм анда утырып теләүчеләргә фотога төшү мөмкинлеге тудырыла.

Питрау кунакларын бик күп сюрпризлар, лазерлы шоу, һ.б. күңелле бизәкләр көтә. Керәшен мәдәнияте фестивале 12 июль кичендә башлана.

БАРЛЫК ЯҢАЛЫКЛАРНЫ УКУ