Мамадыш муниципаль районы

Нократ яр буенда палаткалар шәһәрчеге пәйда булды

2014 елның 30 июне, дүшәмбе

“Яшь гвардия” лагерына йөрүчеләр ялларын хәрби–патриотик әзерлек белән бергә үреп бара. Палаткалардан төзелгән шәһәрчек Нократ яр буенда урнашкан. Биредә күп балалы, аз тәэмин ителгән, авыр хәлле гаиләләрдән булган сабыйлар ял итә. Беренче смена 75 укучыга исәпләнгән. Җәй азагына кадәр “Яшь гвардия” 250ләп баланы колачлар дип көтелә.

–“Яшь гвардия” лагерын элеккеге “Зәңгәр шхуна”ның дәвамы итеп тә карарга була. Төп аерма шунда– хәзер хәрби–патриотик әзерлеккә зур игътибар бирелә. Штатта да моның өчен аерым кеше каралган. 2 палатка хәрби стильдә. Балалар автомат сүтеп җыю, противогаз киеп йөгерү, каршылыклар аша үтү буенча зачетлар да тапшыралар,– ди балалар һәм яшүсмерләр йорты директоры Степан Спиридонов.

Балалар өчен төрле очрашулар да булып тора. Шундыйларның чираттагысы бу атнаның чәршәмбесендә булып узды. Лагерьга Мамадыш районы буенча ЮХИДИ идарәсенең пропаганда инспекторы Рамил Шиһапов һәм 1нче санлы мәктәпнең ТИН фәне укытучысы Рәзин Вильдан килделәр. Мөгаллим укучыларга практик дәрес үткәрсә, Рамил Шиһапов юл йөрү кагыйдәләрен төгәл үтәү, игътибарлы булу зарурлыгын искәртте.

Лагерьда ял итүчеләргә көнгә 6 мәртәбә ашату оештырылган. Ризыклар барысы да учакта әзерләнә. Продуктларны салкын базда саклыйлар.

“Яшь гвардия” палаткалы лагерын республика бюджеты финанслый.

БАРЛЫК ЯҢАЛЫКЛАРНЫ УКУ