Мамадыш муниципаль районы

Мамадышлы Котдүс Зиннәтуллин 60 елга якын җитәкче урыннарда эшләгән

2014 елның 30 июне, дүшәмбе

Җиде яшеннән ятим калып, 14 яшеннән тормыш арбасын җигелеп тарта башлаган якташыбыз юбилеен билгеләп үтә. Котдүс ага Зиннәтуллинга 25нче июнь көнне 80 яшь тулды. Ул әле дә егетләр кебек. Бакча, йорт эшләрендә булыша. Гаиләнең төп терәге.

Котдүс Зиннәтуллин тумышы белән Зур Өске авылыннан. Аңа 7 яшь чагында Бөек Ватан сугышына киткән әтисе һәлак була, тагын берничә елдан үсмер әнисен дә югалта. Шунлыктан, кечкенәдән тормыш арбасын тарта башлый ул.

–Минем балачак дигән әйбер булмады да. Иртәдән кичкә кадәр эштә идек. Авыр еллар. Юньле ризык, кияр кием юк. Булдыра алганча тырыштык инде,– ди юбиляр.

Аның хезмәт юлы армиядән кайткач, сәүдә системасында – Келәүш СельПОсында рәис буларак башланып китә.

–Минем җилкәгә авыл кибетләренең эшчәнлеген тәэмин итү, үстерү бурычы куелды. Ул чагында хәзерге кебек матур кибетләр юк. Склад биналарында сату итәләр. Беренче эш итеп кибетләр төзергә керештек. Келәүштә, Шәдчедә, Җөридә пекарнялар сафка басты.

Юбилярны Келәүштән Мамадыш районы кулланучылар җәмгыятенә сәүдә буенча рәис урынбасары итеп күчерәләр. Бераздан үзен РайПО рәисе итеп билгелиләр. Героебызга анда озак эшләргә насыйп булмый. Котдүс Зиннәтуллин спиртзавод директоры кәнәфиенә утыра. Әлеге коллективка 23 ел җитәкчелек итә ул.

–Завод ул вакытта ясалып җитмәгән спирт кына җитештерә иде. Аракы өчен спиртны башка җирдән ташыйлар. Идарәсе – иске генә бер агач йортта, рәтле-башлы коймасы да юк, бөтен Ушма аръягы малы ишек алдында. Беренче эш итеп коймаларны тәртипкә китердек, кирпечтән ике катлы итеп, ашханәсе һәм буфеты булган административ бина җиткердек. Барлык цехлар реконструкцияләнде, яңа складлар салынды. Заводның җитештерүчәнлеге күтәрелде, аракыны үз спиртыбыздан ясый башладык.

Котдүс Зиннәтуллин идарә иткән елларда завод республика, Союз күләмендә алдынгы урыннарга чыга. Героебыз КПСС Үзәк Комитеты, КПССның Өлкә Комитеты, ТАССР Верховный Советы Мактау грамоталарына, “Мактау Билгесе“ орденына, өч медальгә лаек булды, Мактаулы исемнәр бирелде.

Ә 80 яшен тутырган көнне ул “Мамадыш муниципаль районы каршындагы хезмәтләре өчен” медаленә лаек булды. Әлеге дәрәҗәле бүләкне аңа изге теләкләрен җиткереп, район башлыгы Анатолий Иванов тапшырды.

Котдүс Зиннәтуллин 1958нче елда Раузалия апа белән гаилә кора. Шул дәвердән алып, 56 ел бергә гомер кичерә алар. 2 ул тәрбияләп үстерәләр. Бүген 2 онык һәм 1 оныкчыклары бар. Лаеклы ялга чыккач та берничә ел икмәк пешерү комбинаты белән җитәкчелек итеп, аны үстерүгә зур өлеш керткән.

Чәй табыны артында юбиляр хөрмәтле кунакларга үтелгән тормыш юлы һәм бүгенгесе хакында сөйләде.

БАРЛЫК ЯҢАЛЫКЛАРНЫ УКУ