Сәрия Сабурская Мамадышта халыкны кабул итте

Бүген Мамадышка эш сәфәре белән Татарстан Республикасында кеше хокуклары буенча вәкил, “Халык контроле” дәүләт мәгълүмати системасының баш модераторы Сәрия Сабурская килде. Иң элек район башкарма комитеты җитәкчесе Илнар Хафизов озатуында алар “Халык контроле” системасына проблемалы участоклар буларак мөрәҗәгать ителгән объектлар белән таныштылар. Мамадышлылар М–7 трассасының Берсут авылы турысында тукталыш павильоны булмаудан зарланган. Әлеге мәсьәлә бүгенге көндә уңай хәл ителгән. Совхоздагы Кирпичная, шәһәрдәге Мәктәп һәм Кызылармиячеләр урамнарында яшәүчеләр юлларның торышы начар, дип мөрәҗәгать иткән була. Аларда да вәзгыять халык файдасына чишелеш алган.

“Мамадыш районында җитәкчеләр халык мөрәҗәгатенә битараф түгел, дип әйтергә тулы җирлек бар. Бүген үзем булган объектларда сокланып йөрдем. Әлеге проблемалар гади түгел иде бит. Күпчелек гаризалар “5”ле билгесенә башкарылган. Район башлыгы командасына рәхмәттән башка сүз юк! Сез зур бер гаилә кебек эшлисез икән”,– диде Сәрия Сабурская муниципалитет бинасында район җитәкчелеге белән узган очрашуда.  

Ул шулай ук әлегә Сотый бистәсендә су белән тәэмин ителеш буенча проблема калуын ассызыклады. “Мәсьәләне чишү өчен финанс ярдәме сорап республика җитәкчелегенә мөрәҗәгать итәчәкбез”,– диде Татарстан Республикасында кеше хокуклары буенча вәкил.

Сәрия Сабурская очрашу кысаларында районда эшләүче “Халык почтасы”ның да әһәмияте зур булуын белдерде.

Кеше хокуклары буенча вәкил районыбызга булган сәфәре кысаларында халыкны кабул итүне дә оештырды.