Мамадыш муниципаль районы

Мансур Сафин– Мамадышка дан җырлаучы әдип

2014 елның 15 мае, пәнҗешәмбе

Ул иҗат иткән китаплардан Мамадыш тарихын өйрәнәләр, композиторлар аның әсәрләрен көйгә сала. Район мәдәният йортында туган якка дан җырлаучы шәхесне зурладылар. Шагыйрь һәм тәрҗемәче Мансур Сафинның иҗат кичәсе узды.

Мансур Сафинның балачак һәм мәктәп еллары Мамадыш шәһәрендә үткән. Әдәбият сөючеләр аны шагыйрь, тәрҗемәче, тарихчы һәм публицист буларак белә. “Туган якка дан җырлаучы” дип исемләнгән иҗат кичәсе әдипкә 65 яшь тулу уңаеннан үткәрелә.

Мамадышлылар Мансур Сафинны туган ягыбызга багышлап иҗат иткән әсәрләре, тарихи язмалары өчен аеруча якын итәләр. Бу хакта тәбрикләү сүзләре белән чыгыш ясаган район башкарма комитеты җитәкчесенең урынбасары Алена Смирнова да искәртте.

–“Мамадыш ягы– риваятьләр ягы” китабыннан укучыларыбыз туган төбәк тарихын өйрәнәләр, Мамадышка багышлап язылган шигырәләрегезне яттан сөйлиләр. Композиторлар ул әсәрләрне көйгә сала. Барлык кичәләрдә, очрашуларда катнашырга тырышасыз. Районыбыз гына түгел, ә республика һәм Россия шагыйрьләренең шигырьләрен тәрҗемә итү буенча зур эш башкардыгыз,– диде Алена Смирнова.

Чыгышы азагында юбилярга район башлыгы исеменнән рәхмәт хаты тапшырды.

Мансур Сафин төрле яшьтәге укучылар өчен язылган дистәдән артык китап авторы, Хөсәен Ямашев, Шәйхи Маннур, Кол Гали исемендәге премияләр лауреаты.

Татарстан Язучылар берлеге исеменнән Мансур Сафинны якташыбыз Шаһинур Мостафин тәбрикләде. Ул әдипне тыйнаклык иясе дип атый.

Иҗат кичәсе барышында котлау сүзләрен җирле язучыларыбыз, сәнгать осталары һәм мәктәп укучылары да җиткерде.

БАРЛЫК ЯҢАЛЫКЛАРНЫ УКУ