Мамадыш районында террорчылыкка каршы комиссия утырышы узды
Бүген муниципалитет бинасында район башлыгы Вадим Никитин рәислегендә Мамадыш муниципаль районының террорчылыкка каршы комиссиясе утырышы узды.
Анда күзәтчелек органнары җитәкчеләре, авыл җирлекләре башлыклары, учреждение һәм оешма җитәкчеләре катнашты. Фикер алышуның төп темасы тавыш бирү көннәрендә куркынычсызлыкны тәэмин итү булды. Утырышта катнашучылар сайлау участокларының әзерлеге, саклауны оештыру һәм барлык хезмәтләрнең үзара хезмәттәшлеге турында фикер алыштылар.
Район башлыгы җирлек башлыкларына һәр участокны шәхсән үзе контрольдә тотарга кушты. Шулай ук социаль әһәмияткә ия объектларда куркынычсызлык мәсьәләләре һәм куркыныч янаганда көчләрнең һәм чараларның гамәлләргә әзерлеге каралды. Утырыш йомгаклары буенча җаваплы затларга тиешле йөкләмәләр бирелде. Халыкның куркынычсызлыгы һәм сайлауларны хокук бозуларсыз уздыру һичшиксез өстенлекле булып кала бирә.