Буыннар тантанасы: Мамадыш үзәк район хастаханәсендә яшь медицина хезмәткәрләрен һәм ветераннарын котладылар
«Мамадыш үзәк район хастаханәсе» ДАССОның актлар залында «Яшь белгечне хөрмәтләү» бәйрәм чарасы узды. Быел да, элеккечә, бәйрәмнең аерым кунаклары яшь хезмәткәрләр-табиблар, фельдшерлар һәм шәфкать туташлары булды.
Тантананы баш табиб Руслан Заһир улы Гарипов ачып җибәрде, ул яшь белгечләрне котлады, Мамадыш районының яшәү һәм эшләү өчен уңайлы булуын ассызыклады, шулай ук яңа хезмәткәрләрне торак белән тәэмин итүдә ярдәм иткәннәре өчен шәһәр һәм район хакимиятенә рәхмәт белдерде. Ул билгеләп үткәнчә, агымдагы елда учреждениегә 11 табиб (2се декрет ялыннан), 5 фельдшер һәм 14 шәфкать туташы кабул ителгән. Моннан тыш, үзәк район хастаханәсе хезмәткәрләренә Татарстан Республикасы Сәламәтлек саклау Министрлыгыннан торак сатып алуга 8 грант бирелгән. Бәйрәмнең махсус кунагы-Мамадыш районы Башкарма комитеты җитәкчесе Артур Михайлович Ефимов яшь белгечләрне котлады, районда сәламәтлек саклауны үстерүнең мөһимлеген билгеләп үтте һәм киләчәктә дә уңышлы эшләүгә өмет белдерде.
Чараны хастаханәнең баш шәфкать туташы Галина Николаевна Штукина алып барды, ул бәйрәмнең уңай һәм җылы атмосферасын тудырды. Яшь белгечләр өчен мавыктыргыч конкурслар уздырган әкият персонажы - Убырлы карчыкның барлыкка килүе көтелмәгән һәм күңелле мизгел булды. "Хәле начарлангач", ашыгыч ярдәм бүлеге фельдшерлары аңа оператив рәвештә беренче ярдәм күрсәтәләр, шуннан соң убырлы карчык, гүзәллеккә әверелеп, яңадан бәйрәмгә кушыла. Убырлы карчык ролен оста итеп күп балалы әни, шул исәптән тәрбиягә балалар алган ханым Любовь Ивановна Мазилова башкарды, ә чибәр кыз образында балалар консультациясе мөдире, табиб-педиатр Гөлназ Илшат кызы Гәрәева чыгыш ясады. Бәйрәмдә шулай ук Мамадыш районы сәламәтлек саклау ветераннарын да хөрмәтләделәр.