Мамадыш шәһәре көнендә Бабаниязовлар гаиләсе Мәхәббәт һәм тугрылык өчен медальгә лаек булды
30 августта Мамадышта шәһәр көнен билгеләп үттеләр. Бәйрәм чаралары район үзәгенең күп почмакларында узды, ә кич белән «Яшьлек» скверында концерт һәм салют булды, анда район халкы һәм шәһәребез кунаклары рәхәтләнеп ял итте.
Бәйрәмнең рәсми өлеше үзенчәлекле вакыйгадан — «Мәхәббәт һәм тугрылык өчен» медален тапшырудан башланды. Быел әлеге бүләккә Әлфәт Әхмәт улы һәм Лена Хаевна Бабаниязовлар гаиләсе лаек булды.
Бабаниязовлар гаиләсе - Мамадыш районының үрнәк гаиләсе. Ир белән хатын өч кыз тәрбияләп үстерделәр һәм җиде оныкларын үстерергә булышалар. Балалар тормышларын туган шәһәрләре белән бәйләделәр: олы кызлары Гүзәл «Татспиртпром» АҖ филиалында хисапчы булып, Зөлфия район үзәк хастаханәсендә шәфкать туташы булып эшли, ә Гөлназ 27 ел эчке эшләр министрлыгында хезмәт иткәннән соң үзен гаиләсенә һәм балаларына багышлады. Бүген ир белән хатын лаеклы ялга чыгып, хуҗалык, яшелчә бакчасы һәм оныклар тәрбияләү белән ләззәтләнәләр. Аларның гаилә бәхетенең төп сере-ышаныч, тугрылык һәм традицияләргә сакчыл караш. Быел Бабаниязовлар бергә яшәүләренең 53 еллыгын-уран туен билгеләп үттеләр. Бүләкне тапшырганда, Мамадыш районы башлыгы Вадим Никитин гаиләнең шәһәр һәм район үсешенә керткән өлешенең әһәмиятен ассызыклады. Тантана мәхәббәт, тынычлык һәм яхшылык символы булган ак күгәрченнәрне очыру белән тәмамланды.
ЗАГС бүлеге начальнигы Ләйсән Дөлмиева тантананы ябып, гомуми теләк белдерде: "һәр гаилә бүген баш өстендә тыныч күк йөзе, балаларыбызның якты киләчәге, илебезнең, туган ягыбызның, туган шәһәребезнең чәчәк атуы өчен өзлексез дога кылырга тиеш. Догаларыбызны күкләр ишетсен!».