Мамадыштан Наил һәм Елена Биктаһировлар Республика көнендә никахларын теркәделәр

2025 елның 1 сентябре, дүшәмбе

Казанда Татарстан Республикасы көне уңаеннан зур тантана узды, анда бөтен республикадан берьюлы 45 пар рәсми рәвештә никахларын теркәде. Мәхәббәт һәм гаилә бәйрәме Татарстан рәисе Рөстәм Миңнеханов ярдәме белән узды. Татарстан Республикасы Премьер-министры урынбасары Ләйлә Фазлыева яшь парларга хәер-фатиха сүзләре белән мөрәҗәгать итте. Ул яңа өйләнешүчеләргә үз гаиләләрен саклауларын һәм бер-берсенә һәрвакыт таяныч булуларын теләде. Мамадыш районын әлеге мөһим вакыйгада Наил һәм Елена Биктаһировлар тәкъдим итте.

Яшь гаиләне ихлас күңелдән котлыйбыз, аларга бәхет, татулык һәм ныклы мәхәббәт телибез!