Гөлия Хәбибуллина: “Хәзер мин төп көндәшемнең исемен беләм”

Гөлия Башкортостаннан көмеш медаль белән кайтты. Әлеге республиканың Салават шәһәрендә узган билбауларда көрәш буенча дөнья чемпионатында утыз илдән спортчылар катнашты.

Татарстанның җиде көрәшчесе (шуларның бишесе төрле дәрәҗәдәге медальләргә лаек булды) Россия җыелма командасы составында ил данын якладылар. 14-15нче ноябрьләрдә узган ярышлардан кайтучы якташыбызны каршы алу, шунда ук спортчыбыз үзен ничек хис иткәнен белү өчен, безнең телерадиокомпания төркеме шәһәргә керү юлында “кизү” торды. Ул бәйгеләргә район яшьләр эшләре һәм спорт бүлеге начальнигы урынбасары Илшат Шәйдуллин белән барды. Әңгәмәбез башында ул үзенең рәхмәт хисләрен аңа һәм беренче остазы Владимир Бабушкинга, үзенең күпсанлы дусларына җиткерде.

–Гөлия без сине көмеш медалең белән тәбриклибез. Син бәйгеләрдән канәгать калдыңмы?

–Тулысынча димәс идем. Бит һәр чын спортчы бары тик җиңүгә, абсолют лидерлыкка омтыла. Мин дә чемпионаттан беренче урын беләтн кайтырмын дип уйлаган идем. Аз гына җитмәде. Мин үземнән көчлерәк булган спортчыга оттырдым. Хәзер мин киләчәктә җиңәчәк көндәшемнең кем икәнен яхшы беләм. Әлеге оттырыш миңа ялгышларымны төзәтергә, биек максатка омтылырга этәргеч бирде.

–Якын киләчәктә ни белән шөгыльләнергә исәп? Мондый киеренке көннәр һәм төннәрдән соң рәхәтләнеп ял итәсе ктләдер?

–Юк, тынычлык безнең төшләргә генә керә ул. Шуңа күрә, бүген йокымны туйдырам да, иртәгәдән күнегүләргә тотынам. Быел эре, җитди бәйгеләр юк бугай инде.

–Ярышларга барыр алдыннан сиңа авырлыгыңны киметергә туры килгән. Әзерлекенең бу өлеше авыр бирелгәндер? Күпләр озак еллар диетада утырсалар да, теләгәннәренә ирешә алмыйлар. Спортчыларның ул ничектер тиз килеп чыга: артык авырлыкны киметү дип әйтүем...

–Чыннан да, миңа бераз ябыгырга туры килде: биш-алты көн эчендә 5 килограммны “алып ташладым”.

–Бу зур физик авырлыклар, ихтыяр көче һәм теләк нәтиҗәләре, Гөлия – акыллы кыз. Күптән түгел генә операция кичергән спортчы өчен бу зур уңыш. Аның якты җиңүләре алда әле, – дип безнең әңгәмәгә Илшат Шәйдуллин кушылды.

Безнең белән көмеш медаль иясен район яшьләр эшләре һәм спорт бүлеге начальнигы Таһир Галимханов та каршы алды. Ул Гөлиягә чәчәк бәйләме тапшырды, барлык спорт сөючеләр исеменнән тәбрикләде.   

  

Гөлназ Кадыйрова