Томан артында яктылык күренерме

Кем ничектер, шәхсән мин үзем һәр атнаның пәнҗешәмбесен зур түземсезлек белән көтеп алам. Бу көнне район мәдәният йортына барганда күңелемне, тамашачы хөкеменә нинди спектакль тәкъдим ителер икән, дигән сорау яулап ала.

Блегә Аллага шөкер, шәһәребез оешма-предприятиеләре, учреждениеләренең һәвәскәр артистлары тамашачыларның өметләрен аклап киләләр. Бер генә спектакльдән дә кәеф кырылып кайтканы юк. Кемдер комедия сәхнәләштерсә, икенче берәүләр халык әкиятләренә корылып иҗат ителгән әсәрне тамашачы хөкеменә чыгара. Ә узган атнада “Бәләкәч” балалар бакчасы, район элемтәчеләре, почта оешмасы, санитария-эпидемиология хезмәте һәм район хәрби комиссариаты коллективлары Рәдиф Сәгъдинең “Алсу томан” әсәре буенча куелган ике пәрдәле моңсу драмасын сәхнәләштергәннәр иде. Бүгенге көн проблемасына әверелгән наркомания, фәхишәлек, бозыклык темалары күтәрелә анда. Әсәр геройлары Алсу, Ваня, Оксана һәм гарип кыз Фәридәне ачы язмыш ятимлек, тирә-юньдәгеләрнең битарафлыгы, җәмгыятьтәге төрле вәзгыятьләр бергә туплаган. Алар бер доза наркотик өчен барысын да эшләргә әзер торалар. Чөнки бу геройлар коллар өммәтендә яшиләр. Мескеннәрне көчсезлегеннән сутенер Артур белән аның апасы Ася Есиповна бик оста файдаланалар. Әгәр аларга Чечнядан Татарстанга әбисен эзләп килгән көчле рухлы татар егете Марат очрамаган булса, геройларның язмышлары ни белән тәмамлаган булыр иде, монысын күз алдына да китерүе мөмкин түгел. Марат үз тормышын куркыныч астына куеп, Алсуны, Ваняны, Оксананы һәм Фәридәне замананың яман чирләреннән йолып кала. Әлеге гамәле белән ул яхшылыкның яманнан өстен булуын исбатлый.

Рольләрне башкарган “Бәләкәч” балалар бакчасында, почта һәм элемтә хезмәтендә эшләүчеләр тамашачылар күңелен яулагандыр дисәм, ялгышмамдыр. Гомумән, быел оешма-предприятиеләр, учреждениеләр спектакльләр сезонын уңышлы башлап җибәрделәр. Район мәдәният йорты сәхнәсендә инде сынау тоткан коллективлар арасында берсен югарыга чөеп, икенчеләрен көчле тәнкыйть утына алырлык түгел. Мәртәтбәле жюрига иң көчлеләрен барлау өчен, ай-һай, җиңел булыр микән? Алда чыгыш ясаячак коллективлар да сынауны уңышлы узарлар дип ышанасы килә.

Николай Зюрин