“Халык контроле” – халык контролендә

Ай башында муниципаль район башлыгы Анатолий Иванов Мамадыш муниципаль районында “Халык контроле” дәүләт мәгълүматый ситемасында эш буенча регламентны раслау турында”гы карарга кул куйды. Аның нигезендә системадан файдаланучылардан кергән мәгълүматларны әзерләү һәм аларны башкару өчен җаваплы затлар да билгеләнде.

Җөмһүриятебез гражданнарыннан кергән гаризаларның (уведомлениеләрнең) зур күпчелеге территорияләрне төзекләндерүгә һәм юл хәрәкәтен оештыруга кагыла. Бу турыда сишәмбе көнне журналистлар өчен Татарстан Министрлар Кабинетында үткәрелгән брифингта республикада кеше хокуклары буенча уполномоченный Сария Сабурская белдерде. Ул агымдагы елда “Халык контроле” дәүләт мәгълүматый системасының ел башыннан башкарылган эшләренә йомгак ясады. Аның сүзләренә караганда, җөмһүриятебездә әлеге чор эчендә гражданнардан 9622  хәбәр кергән. Аларның 57 проценты хәл ителгән. Бу система узган елның апреленнән гамәлдә йөри инде. Проект старт алганнан бирле барлыгы 14468 гариза теркәлгән (бездә – 33), шуларның 51 проценты (Мамадыш районында – 60 процентка якын) уңай хәл ителгән. Бездә хәбәрләрнең дүртесе тикшерү планына кертелгән, унысы мотивацияле кире җавап кагылган.  Бүгенге көндә кешеләрне иң борчыганы мобиль элемтә белән юл хәрәкәтен оештыру (12 һәм 9 уведомление). Соңгысының бишесе канәгатьләндерелгән. Икесе тикшерүгә планлаштырылган, тагын икесе мотивацияле кире кагылган. Статистик мәгълүматлардан күренгәнчә, районыбызда яшәүчеләрне, югарыда телгә алынганганнардан тыш, балалар бакчасына, территорияләрне төзекләндерүгә, санитария хәленә, чүплекләргә, җәмәгать транспортына, стационар элемтәгә кагылышлы проблемалар борчый икән.

 «Хәбәрләр өстендә эшләү өчен билгеле бер система булдырырга кирәк. Һәр гариза, мөрәҗәгатькә җитди игътибар белән карасаң гына уңай нәтиҗәгә ирешергә мөмкин,” – диде ул. Кеше хокуклары буенча уполномоченный Татарстан республикасында “Халык контроле” дәүләт мәгълүматый системасында тагын бер проблеманы билгеләр үтте: ул – хәбәрләрне тикшерү вакыты. Проблемаларны хәл итү өчен ун көн срок бирелә, ә “Торак-коммуналь хуҗалыгы” категориясенә кагылышлы уведомлениеләр өч көн эчендә хәл ителергә тиеш. Алар үтәлми икән, димәк, түрәләрне гади халыкның проблемалары борчымый дигән сүз. Сария Сабурская: “Тиешле карар чыгару, яисә җавап бирү сроклары сузыла икән, монда җаваплы башкаручыларның, “Халык контроле”ндә хезмәт куючыларның үз вазыйфаларына җитди карамулары белән бәйләү дөресрәк булыр, дип ассызыклады. Тагын шунысын ассызыклап үтәргә кирәк: “Халык контроле” системасына мөрәҗәгать итүчеләр дә үзләренең гозерләре тулысынча үтәлергә тиеш, дип ялгышмасыннар. Аларның кайберләре нигезле кире кагылырга да мөмкин. Чөнки башкарма органнарның хәбәрдә күрсәтелгән проблемаларны хәл итәргә законлы хокуклары, яисә финанс мөмкинлекләре чикле булырга мөмкинлекне истән чыгармаска кирәк.  

Николай Михайлов