Батырлык онытылмый–Вишнякова

“Венгриянең Балатон күле өчен барган сугышларда Башкомандующий Сталинның Рәхмәте белдерелгән булган икән. Кәгазе шәхси эшегездә сакланган,” – диде Мамадыш почтамты Фаяз Габдрахманов Бөек Ватан сугышы ветераны Елизавета Вишнякованы 90 яшьлек юбилее белән котлаганда. 

Урманчы авылында туган, дүртенче сыйныфта укыганда әти-әнисе Мамадышка күченеп, беренче мәктәпне тәмамлаган кыз сугыш башлануга Аксубайдагы радистлар әзерләү мәктәбенә укырга җибәрелә. 1942нче елның башыннан Карелия фронтына билгеләнә. 1944нче елны 133нче укчы корпус оештырылгач, радист Елизавета да үзен аның составына күчерүләрен сорый. Зоя Лебедева исемле кыз белән икесен корпус командующие генерал-майор Павел Артюшенко карамагына билгелиләр. Корпус өченче Украина фронты карамагына тапшырыла. Сугышчан юлларын Украинаны азат итүдән башлап, Венгриянең Балантон күленә кадәр барып җитәләр.

–Карелиядә бик каты сугышлар булмады. Украинада исә дошман безнең территориядән чыкмас өчен, теше-тырнагы белән ябышып сугышты, – дип искә ала ветеран. “Батырлык өчен” медале белән бүләкләнә ул. Кызлар корпус командующиеның дивизияләр, полклар белән элемтәсен тәэмин итәләр. Пртюшенконы йөртүче сержант Андрей Вишняков белән дуслыклары шул вакыттта башлана һәм олы мәхәббәткә үсеп җитә. 

Кыз армиядән 1946нчы елны демобилизацияләнә. Әтисе Николай Филиппов хезмәт армиясеннән кайткач Берсут Пристаненында йорт җиткереп, гаиләсен шунда алып кайткан була. Елизавета анда озак тормый, Андрей үзенең туган ягына Төмән өлкәсенә алып китә. 

–Бер йорттта җиде гаилә идек. Андрейның кыз туганнары яулыкларымны да япты, күлмәкләремне дә киде. Бергә бик тату яшәдек,–ди Елизавета Николаевна. Анда элемтә узелында эшкә урнаша. Ике балалары туса да, гомерләре генә булмый. “Кыркып беткәнең син. Шуңа күрә балалар да яшәмәгәндер, ди торган иде ирем,”–дип искә ала ул елларны ветеран. Ире вафат булгач, Мамадышка әйләнеп кайта ул һәм район элемтә узелында эшли башлый. Шуннан пенсиягә чыга. Хәзер инде аңа 90 яшь. Социаль хезмәткәр Гөлнур Сибгатуллина көн дә килеп, ярдәм итеп тора. Туганнары да күп, алар да бик еш шалтыратып, кереп хәлен белеп торалар. Махсус программа буенча барлык уңайлыклы фатир да алды. Бүген өендә акрын гына йөреп тора. Күршеләрендә туган ягыннан да якташлары бар икән. Алар да кереп утыралар. Хәтере һаман да яхшы, күңеле күтәренке әле аның. 

Минневәрис Мингалиев