Мамадышлылар Гиннесның рекорд китабына керделәр

Райондашларыбыз Камил Хисмәтов белән Нургали Гобәйдуллинның исемнәре–Гиннесның рекордлар китабында. Уникаль шәхесләр бар инде арабызда!

Лондонның “Гиннесның дөнья рекордлары “ штаб-фатиры  беренче тапкыр гер спорты осталарының Халыкара конфедерациясеннән коллектив рәвештә дөнья рекорды кую турында  гаризасын кабул иткән. Һәм менә агымдагы елның 4нче ноябрендә Архангельск шәһәрендә “300 спартанчы” 30 минут буе гер күтәреп, дөнья рекордын куйганнар, данлыклы китапка кертелгәннәр. Аларның сафларында якташларыбыз–гер буенча Халыкара класслы спорт мастеры Камил Хисмәтов белән спорт мастеры Нургали Гобәйдуллин да була.

–Бөтен дөньядан–Италия, Польша, Греция, Россиянең 56 төбәгеннән иң күренекле 300 герче җыелган иде. Спорт комиссары Джек Брокбэнк хөкемдарлык итте. Иң-иңнәр белән янәшә басып гер күтәреп, тарихка кердек. Әлеге вакыйга күңелгә горурлык хисе өсти, яңа җиңүләргә рухландыра,– диләр алар. 

Икесе дә үз авырлыкларында, яшь категорияләре арасында беренчелекне яулап, гер спорты осталарының Халыкара конфедерациясенең медальләренә, дипломнарына ия булганнар. 

“Гиревой спорт мастеров” дигән журналның соңгы санында Камил Хисмәтовның фотосы белән мәгълүмат та урнаштырылган. “Гер спорты ветераны Эльбрусны буйсындырды” дип исемләнгән мәкалә дә аның турында. “Камил Хисмәтов 4200 метрлы биеклекне буйсындырды. Европаның иң биек ноктасына күтәрелеп кенә калмады, үз авырлыгында 5 рекорд та куйды һәм Эльбрус тавының экстремаль шартларында гер триатлоны чемпионатында шуның кадәр үк беренчелекне яулады. Эльбрус түбәсендә һава дефициты 60 процент тәшкил итә, шкваллы җил, кар, боз. Хәрәкәт итү бик авыр бирелә, кан куера, пульс ешая. Гер күтәрү осталарының Бөек Ватан сугышында Кавказдагы совет сугышчылары-азат итүчеләр истәлегенә багышланган “Эдельвейс”  халыкара турнирында катнашучылар беренче Бөтендөнья “Экстрим” олимпиадасында үз көчләрен шулай сынадылар һәм максатларына ирештеләр. “55 кеше арасында мин Татарстаннан берүзем идем. Биш көн буе ярыштык. Биеккәрәк менгән саен суларга һава җитми, кешеләр хушларын җуялар. Медиклар  гына аңга китерә. Минем дә баш әйләнә башлаган иде, 15 минуттан экстремаль шартларга ияләштем. 3400, 3800, 4200 метр югарылыкта яхшы нәтиҗәләр күрсәттем. Без  киләчәктә 5642 метрлы ноктада ярышырга сүз куештык”,–ди ветеран”,–дип языла анда.

Камил ага киләсе елның февраль аенда Көньяк Американың иң биек ноктасы–Чимборасо вулканында 5000 метр өстә гер триатлоны буенча С.Боливарга багышланган беренче Халыкара турнирында катнашырга җыена. Тиздән Киров шәһәрендә узачак Россия Чемпионатына икесе дә чакыру алганнар. Хәерле юллар, яңа җиңүләр юлдаш булсын!