Кубоксыз калсак та, үкенечле түгел

Зурларның быел да төп бүләксез калуын тәнкыйтьләргә кирәкми. Чөнки командабызның нигезен 1997-1998нче елларда туган яшүсмерләр тәшкил итте. Көндәшләр исә инде төрле бәйгеләрдә сынаулар узган ир-егетләр иде.

Сүз узган атнада Әфганстанда интернациональ бурычын үтәгәндә һәлак булган, Югары Яке авылы егете Ирек Мөхетдинов истәлегенә оештырылган уналтынчы турнир турында. Агымдагы елда да күпсанлы командалар катнашында үтте ул. Укучы кызларның – 12, малайларның – 14, зурларның 7 командасы өч көн дәвамында иң көчле коллективны барлау өчен “Олимп” спорт комплексында, шәһәрдәге 2нче санлы лицей һәм 3нче санлы урта мәктәпнең спорт залларында, чын мәгънәсендә, кызу көрәшләр барды. Шунысы игътибарга лаек, авыл мәктәпләрендә  дә спортның әлеге төренә игътибар зурлыгын күрергә насыйп булды. Алардан килгән кайбер коллективлар волейбол белән махсус шөгыльләнүче командаларга җитди каршылык күрсәттеләр. Мәсәлән, Җөри урта мәктәбенең 1999нчы елда туган кызлары Яр Чаллының спорт мәктәбендә шөгыльләнүче яшьтәшләренә җитди каршылык күрсәттеләр. Җәнлек совхозы мәктәбе кызларының уеннары да җанатарлар хөрмәтенә лаек булды. 

Турнир нәтиҗәләренә күз салыйк. Укучы кызлар арасында “Яр Чаллы-1997-98” кызлары финалда безнең район җыелма командасын бирелдереп, җиңүгә ирештеләр. Өченче урында – “Яр Чаллы-1999-2000”  волейболчылары. Яшүсмерләр арасында мамадышлыларга тиңнәр булмады. Алар хәлиткеч уенда Теләче командасын бирелдерделәр. Сабалылар пьедесталның өченче баскычында. Зурлар арасындагы бәйгеләргә килгәндә, быел барлыгы җиде коллектив төп Кубок өчен көрәште. Менә өченче ел рәттән инде төп бүләк өчен Мамадыш, Саба, Алабуга һәм Чмстай волейболчылары “бил алышты”. Кызганычка каршы, безнекеләр беренче ярымфиналда Алабуганың “ЕЭС” командасына җиңелделәр. Икенче ярымфиналда Чистайлылар өстенлеккә иреште. Финалда исә алабугалылар үзләренең быел бәйгеләргә ныклап әзерләнгәнлекләрен исбатладылар. Чистай волейболчылары – икенче, былтыр Кубокны откан Саба командасы өченче урыннарда. Мәйдан хуҗалары агымдагы елгы турнирда дүртенче урын белән генә канәгатьләнделәр. Ләкин моннан трагедия ясарга кирәкми. Яшь командабыз төрле турнирларда катнашып, тәҗрибә туплар. Ә аның артыннан җиңүләр киләсен спорт сөючеләр яхшы белә.

Николай Зюрин