Мамадыш муниципаль районы

Ветераннарга бүләкләр өләшәләр

2015 елның 8 мае, җомга

Ветераннаргабүләкләрөләшәләр. Җиңү бәйрәме алдыннан фронтовикларга, тыл хезмәтчәннәренә һәм сугыш чоры балаларына күчтәнәчләр, азык-төлек пакетлары, башка төр бүләкләр тапшыру гадәте бар. Җитәкчелек тарафыннан әлеге күркәм чарадан бер генә оешма-предприятие дә, авыл җирлеге дә читтә калырга тиеш түгел, дигән бурыч та куелган иде.

“Мамадыш спиртзаводы“ коллективы юбилей елы булганлыктан, үзләренә беркетелгән Бөек Ватан сугышы ветераннарын аеруча зурладылар. Михаил Кириллович Иванов гаиләсенә завод директоры Николай Захаров җитәкчелегендәге делегация суыткыч, дарулар алу өчен ун мең сумга сертификат һәм азык-төлек белән килделәр. Тумышы белән Җөри төбәгеннән булган ветеранга 90 яшь тула. Чәй табыны артында Михаил Иванов кунакларга сугыш еллары хакында сөйләде. Ул хәрби хезмәткә 1943нче елда алына. Ерак көнчыгышта элемтәче булып хезмәт иткән. Күпсанлы медальләре һәм мактаулы исемнәре бар. Тормыш иптәше Пелагия белән 7 бала тәрбияләп үстерәләр. 13 онык һәм 6 оныкчыклары бар. 1985нче елда лаеклы ялга чыга. Хезмәт юлының күпчелек өлешен Ленин исемендәге күмәк хуҗалыкка багышлаган.

“Мамадыш спиртзаводы“ коллективы тәбрикләгән чираттагы ветеран Николай Васильевич Баженов иде. Ул да тугызынчы дистәсен түгәрәкләгән. Тумышы белән Каменный Починок авылыннан.

“1944нче елда Карелия фронтында көрәштем. 40 көн эчендә сугыша-сугыша 200 чакрым юл уздык. Финляндия чигенә кадәр барып җиттек. 1945нче елда 2нче һәм 3нче Украина фронтында хезмәт иттем”,- дип сөйләде ветеран.

Аның Ватан сугышы ордены һәм күп санлы медальләре бар. Сугыштан соң озак еллар Мамадыш совхозында эшләгән. Тормыш иптәше Наталья белән 3 бала тәрбияләп үстерәләр. Бүген аларның 4 онык һәм шул ук санда оныкчыклары бар. Әлеге фатирны Җиңүнең 65 еллыгы уңаеннан дәүләт бүләк иткән. Чираттагы юбилей датасы уңаеннан Баженовлар гаиләсенә “Мамадыш спиртзаводы“ коллективы телевизор һәм шулай ук даруларга сертификат белән күчтәнәчләр тапшырды.

Кунаклар саубуллашыр алдыннан хөрмәтле ветераннарга тыныч тормыш бүләк иткәннәре, Ватаныбыз азатлыгы өчен үзләрен аямыйча сугышканнары өчен чын күңелдән рәхмәт белдерделәр.

БАРЛЫК ЯҢАЛЫКЛАРНЫ УКУ