Мамадышта аюлар кышкы йокыдан уянган.

Мамадыш районының “Берсут “ аучылык хуҗалыгында яшәүче аюлар — Гриша, Катя һәм Степа кышкы йокыдан уянган. Алар өчен “өн”не читлекләрендә саламнан ноябрь аенда ясаган булганнар.

“Хайваннар әлегә бераз сүлпәнрәк, бәлки бу аларның бик тавышлы күршеләре — лайкаларга бәйледер. Ерткычлар быел гадәттәгедән иртәрәк уянды. Аюлар ботка һәм аш белән туклана”, - ди “Берсут” спорт сунарчылык-балыкчылык клубы рәисе Сергей Ипкеев.

Беренче булып 4 яшьлек Гриша, аннан соң 8 яшьлек Катя, соңрак исә 2 яшьлек Степа уянган. Ә аларның күршесендә урнашкан дәүләтнең “Чистые луга” вакытлыча аучылык территориясендә аю эзләре әлегә күренми, анда яшәүче көрән аю йокысыннан уянмаган булса кирәк, дип сурәтли Мамадышның “Нократ” басмасы.