Мамадышта “Изге касә“- “Святая чаша“ комплексын төзекләндерәләр.

Мамадышта “Изге касә“- “Святая чаша“ комплексын төзекләндерәләр. Шәһәр халкы бирегә тәмле су алырга килсә, төбәгебез кунаклары һәм туристлар мондагы матурлыктан хозурланмыйча китми, диярлек. Реконструкция эшләре төгәлләнгәч, аның территориясе тагын да күркәмләнәчәк.

“Изге касә“ комплексын төзекләндерүгә ике атна чамасы элек керешкәннәр. эшләрне “Инвест-төзү“ җәмгыятенең 10 кешелек бригадасы башкара. Әлеге игелекле гамәлне башлап йөрүче кеше- якташыбыз Раджив Иванов. Реконструкция кысаларында часовня бинасы яңартыла, чишмәнең һәм комплекс территориясен төзекләндерәләр. Без килгәндә “Инвест-төзү“ хезмәткәрләре өч төркемгә бүленеп буяу-агарту, тротуар түшәү кебек эшләр белән шөгыльләнәләр иде. Буаның стенасын ныгыту өчен бер ягын бетон белән катырганнар. Алга таба буаның әйләнәсе 1 метр 60 сантиметр киңлектәге тротуар белән әйләндереп алыначак. Аның өстенә брусчатка түшәлә. Комплекс территориясенә кара балчык таратыла, газон җәеләчәк. Территориягә утыргычлар һәм өстәмә яктырткычлар да куячакбыз,- ди төзүчеләр.  

Исегезгә төшерәбез, Беркас елгасы буендагы әлеге чишмә үзенең искиткеч тәмле һәм шифалы суы белән инде берничә гасырлар дәвамында билгеле. Элекке еларда да Изге касәгә төрле төбәкләрдән кешеләр килә торган була. Өлкәннәр әйтүенчә, андыйлар арасында хәтта Киров өлкәсе, Уфа губернасы, Казан астында яшәүчеләр дә булган.

2012нче елда изге чишмә төзекләндерелеп, барлык халык өчен дә ачылган иде. Шушында ук коену урыны да бар. Изге суга чумып чыккан кеше ел әйләнәсе авырмаячак, дип тә әйтәләр.

Хәзер “Изге касә“нең популярлыгы тагын арта башлады. Әлеге урын районыбызның туристлык маршрутына да кертелгән.