Мамадыш муниципаль районы

Бөек Җиңүнең 70 еллыгын билгеләп үтәр алдыннан районыбыз торак пунктларында 8 яңа һәйкәл ачылды.

2015 елның 8 мае, җомга

Бөек Җиңүнең 70 еллыгын билгеләп үтәр алдыннан районыбыз торак пунктларында 8 яңа һәйкәл ачылды. Аларда яу кырыннан әйләнеп кайта алмаган якташларының исемнәре уеп язылган. Гомумән, фронтта ятып калган мамадышлыларның саны 8 меңнән артык.

Бөек Җиңүнең 70 еллыгын каршылау көне алдыннан 8 авылда яңа һәйкәлләр ачылды. Тантаналы чараларның берсе район башлыгының туган ягы- Ылыяда уза.

Ылыядагы һәйкәлгә язылачак исемнәрне эзләү өчен Җөри урта мәктәбе укытучысы Владимир Кузнецов зур көч куйган. Бу авылдан фронтка киткән 100 кешенең 50се генә әйләнеп кайта. Алар арасыннан Михаил Ильин гына бүген безнең арада. Һәйкәлне булдыруга һәрьяклап ярдәм күрсәткәннәре өчен ылыялылар район башлыгы Анатолий Ивановка, аның энесе, “Чулпан” иминият компаниясе филиалы җитәкчесе Николай Ивановка, Казандагы “Энергострой” җәмгыяте җитәкчесе Юрий Федоровка һәм башка авылдашларына чиксез рәхмәтле.

Бүгенге көндә дистәгә якын йортта, нигездә, өлкән яшьтәгеләр генә яшәүче Урта Шүләңгер авылында да һәйкәл ачылды. Авылдан сугышка киткән 35 кеше кайтмый. Һәйкәлдә аларның исемнәре мәңгеләштерелгән. Киләчәктә аның янәшәсендә фронттан исән кайткан кешеләрнең исемнәре язылган таш та урын алачак, дип белдерде тумышы белән Урта Шүләңгердән булган Мамадыш шәһәре башкарма комитеты җитәкчесе Рәшит Гарипов. Шунысы сөенечле, кечкенә генә Урта Шүләңгердә булып узган әлеге тарихи вакыйга күп кенә авылдашларны җыйган иде. Һәйкәл урнаштыру эшләрен төп башлап йөрүче бүгенге көндә Ижевск шәһәрендә яшәүче Рафис Хәкимов икән.

Әлеге чараларда һәйкәлләрне булдыруда активлык күрсәткәннәр район җитәкчелеге тарафыннан билгеләп үтелде, мәктәп укучылары ветераннарга патриотик рухта әзерләгән чыгышларын бүләк иттеләр.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ