Мамадыш муниципаль районы

Район үзәк хастаханәсе территориясендә алмагачлардан гына торган Хәтер аллеясы барлыкка килде.

2015 елның 7 мае, пәнҗешәмбе

Район үзәк хастаханәсе территориясендә алмагачлардан гына торган Хәтер аллеясы барлыкка килде. Җирле сәламәтлек саклау учреждениясе хезмәткәрләре үз участокларында Бөек Ватан сугышында катнашкан коллегалары истәлегенә алмагач үсентеләре утырттылар.

7нче май көнне Мамадыш районы үзәк хастаханәсе территориясендә Бөек Җиңүнең 70 еллыгы кысаларында мемориаль такта барлыкка килде. Биредә Мамадыш районыннан Ватан сугышында катнашкан медицина хезмәткәрләренең исемнәре мәңгеләштерелгән. Әлеге тактада 65 фамилия. Алмагачлардан торган Хәтер аллеясы да нәкъ менә шушы ветераннар хөрмәтенә барлыкка килде.

Аллеяда алмагачларның төрле сортлары үсәчәк. Аларны утыртуда катнашучылар киләчәктә бу урында зур алма бакчасы барлыкка килүенә ышана.

Хезмәт өмәсендә хастаханәдә эшләүчеләрнең зур күпчелеге катнашты. Әлеге коллектив шушындый чараларда нәкъ менә бердәмлеге белән башкаларга үрнәк булып тора. Агач утыртучылар арасында Галина Штукинаның туганы Валерий Смирнов та бар иде. Ул үсентеләрне әбисе һәм бабасы хөрмәтенә утырта.

“Сугышта катнашучылар арасында безнең туганнарыбыз да бар иде- әбиебез Александра Зайкова һәм аның апасы Зоя Овсянникова, иптәше Николай Овсянников. Алар сугышны башыннан азагына кадәр үттеләр. Кабат тыныч тормышта сәламәтлек саклау тармагында хезмәт куйдылар”,- ди Галина Штукина.

Өмәдән хастаханәнең баш табибы Дамир Хаҗиев та читтә калмады. Аның әйтүенчә, хәзер төп бурычлары- әлеге агачларны саклау һәм тәрбияләп үстерү. Ә киләчәктә паркның территориясен тагын да зурайтырга уйлыйлар.

БАРЛЫК ЯҢАЛЫКЛАРНЫ УКУ