Мамадыш муниципаль районы

Бөек Җиңү темасына багышланган смотр-конкурстан авыл җирлекләре дә читтә калмады.

2015 елның 2 мае, шимбә

Бөек Җиңү темасына багышланган смотр-конкурстан авыл җирлекләре дә читтә калмады. Алар Мамадыш тамашачысы һәм жюри вәкилләре алдында язучыларның драма әсәрләрен сәхнәләштерделәр. Шушы көннәрдә иҗади бәйгегә нәтиҗә ясадылар. Бүләкләү тантанасы район мәдәният йортында узды.

Смотр-конкурсның нәтиҗәләрен игълан итү максатыннан әзерләнгән тамаша иң яхшы дип табылган өзекләрне кабатлап күрсәтүдән башланды. Сезон дәвамында районыбыз авыл җирлекләренең сәнгать сөючеләре көче белән 23 спектакль, 4 театральләштерелгән тамаша әзерләнде. Мәртәбәле жюри вәкилләренә аларны бәяләр өчен авылларга да чыгарга туры килгән. Барлык чыгышлар да тулысынча Бөек Ватан сугышында җиңүнең 70 еллыгына багышланды.

Авыллардагы сәнгать осталары әзерләгән тамашалар Бөек Ватан сугышы елларында халкыбызның фронтта һәм тылда күрсәткән тиңдәшсез батырлыгы үрнәкләре белән яшь буынны таныштыру; буыннар арасындагы бәйләнешне ныгыту, укучылар күңелендәге сугыш чорын, намуслы хезмәт белән көн күргән сугыш һәм тыл ветераннарына, апаларга, әбиләргә, тыл ветераннарына олы хөрмәт хисе тәрбияләү, гадел, тату, эшчән, игелекле булырга омтылыш уяту максатын да күз уңында тотты.

Нәтиҗәләргә килгәндә, “Иң яхшы хатын-кыз роле“ номинациясендә Рәзинә Зиннәтуллина – Олыяз, Тәнзилә Сәйфуллина – Кече Сон, Разыя Фәсхетдинова – Дүсмәт, Венера Аксакова – Усали, Гөлчәчәк Әхтәмова – Түбән Шүләңгер, Гөлназ Галимова – Кече Кирмән,Гөлгенә Исмәгыйлова – Уразбахты, Гөлфия Гайнуллина – Тәкәнеш, Дания Кашапова Көмешкүл авыл җирлекләре җиңү яуладылар.

“Иң яхшы ир-атлар роле“ номинациясендә Рөстәм Галиев – Урта Кирмән, Илфир Гыйззәтуллин – Кече Кирмән, Рәүф Йосыпов – Кече Сон, Зәки Галиев – Көек-Ерыкса, Йосып Гыйльфанов – Түбән Ушма, Әсхәт Абдуллин – Түбән Яке, Илдар Хәйруллин – Шәмәк, Рифкать Нәҗипов – Никифорово, Илдар Вәлиев – Шәдче, Дамир Загретдинов Усали авыл җирлекләре бүләкләнде.

“Иң яхшы комик роль“ номинциясендә Гөлнур Закирова – Көмешкүл, Гүзәлия Фәләхова – Югары Сон, Әнисә Габдреахманова Югары Яке авыл җирлекләре, “Иң яхшы эпизодик роль“ номинациясендә Александр Сомов – Соколка, Илнур Нуруллин – Олыяз, Марина Калмыкова Таиле авыл җирлекләре тәбрикләделәр. Усалидан Адель Әхмәтҗанов иң яшь һәм сәләтле роль өчен махсус бүләккә лаек булды.

“Иң яхшы режиссер эше“ номинациясендә: Фәрит Хуҗин – Кече Сон, Альмира Нәфыйкова Дүсмәт авыл җирлекләре җиңү яуладылар.

Коллективлар арасында 1нче урынны Сон, Кече Кирмән, Дүсмәт, Түбән Ушма һәм Урта Кирмән җирлекләре яулады. Ә смотр-конкурсның Гран-при иясе: Түбән Сон авыл җирлеге коллективы. Төбәкнең сәнгать осталары Әнгам Атнабаевның “Мәхәббәт турында җыр“ әсәрен сәхнәләштерделәр. Сәхнәгә куючы режиссеры – Зөлфирә Дәүләтшина.

БАРЛЫК ЯҢАЛЫКЛАРНЫ УКУ