“Хәтер“ эзләнү отряды “Любан экспедициясе“нә китте.

“Хәтер“ эзләнү отряды “Любан экспедициясе“нә китте. 87нче санлы һөнәри көллият мөгаллиме Вера Фәйзриева җитәкчелегендәге студентлар төркеме әлеге чарада өченче тапкыр катнаша. Сәфәргә кузгалыр алдыннан коллектив ветераннар белән очрашып, өлкәннәрнең хәер-фатыйхаларын алдылар.  

87нче санлы һөнәри көллият мөгаллиме – “Хәтер“ эзләнү отряды җитәкчесе Вера Фәйзриева һәм аның шәкертләре кунакларны эшчәнлекләре белән таныштыралар. Ә кунаклар дигәнебез- төбәгебезнең иң хөрмәтле шәхесләре: Бөек Ватан сугышы ветераннары, тыл хезмәтчәннәре, сугыш чоры балалары, башка хәрби бәрелешләрдә катнашкан ветераннар. Алар “Хәтер“ отряды башкарган эшләрне кызыксынып тыңлый.  Һөнәри көллияттә оештырылган әлеге төркем ел саен, Бөтенроссия Хәтер Вахтасы кысаларында, Бөек Ватан сугышы елларында Ленинград өлкәсендә һәлак булган һәм күмелгән билгесез солдатларның каберләрен эзләп табуда һәм күчереп күмүдә катнашалар. Коллектив “Ватан“ иҗтимагый берләшмәсендә теркәлгән, үз паспорты бар. Алар быелгы “Любан экспедициясендә“ 4нче майга кадәр булачак. 6 кешелек отрядтан студентлар Алмаз Хөсәенов, Булат Садыйков һәм Денис Сергин бу чарада өченче тапкыр катнаша.

Алга таба ветераннар өчен уку йорты бинасы буйлап экскурсия оештырылды. Өлкәннәргә заманча җиһазландырылган лаборатория, бүлмәләрне күрсәттеләр. 

-Иң элек ветераннарга рәхмәт сүзләре әйтәсе килә. Алар өлкән булуларына карамастан барлык очрашуларда да теләп катнашалар. Авылларга да йөрдек. Хәзер очрашулар балалар бакчаларында да уза. 

Көллиятнең актлар залында ветераннар өчен тирән эчтәлектәге концерт программасы әзерләнгән иде. Уку йорты мөгаллимнәре һәм шәкертләр кунаклар алдында патриотик рухтагы сәхнә номерлары белән чыгыш ясады.