Көллиятне танымаслык

Шәһәребездәге 87нче санлы һөнәри көллият 2014-2020нче елларга икътисад, сәнәгать һәм агросәнәгать комплексы өчен югары квалификацияле белгечләр әзерләү буенча ресурс үзәкләре оештыру программасын кертелде. Андый уку йортларының саны Татарстанда 25-кә тигез. Хәзерге вакытта учреждения биналарында төзекләндерү эшләре алып барыла. Реконструкция төгәлләнгәч, көллиятебездәге шартлар европадагыча булачак,- ди аның директоры Николай Егоров.

Быелның 15нче гыйнвареннан шәһәрдәге 87нче санлы ҺК-тә капиталь ремонт эшләре башланып китте. 25 ел элек төзелгән биналарны тулысынча диярлек үзгәртеп коралар. Эшләр уку корпусларында, спорт залында, тулай торакта һәм остаханәләрдә алып барыла. 

-Узган ел ТР Хөкүмәтенең мәгариф һәм фән министрлыгы тарафыннан Мамадышның ҺК базасында ресурс үзәге төзү карары кабул ителде. Ул халык хуҗалыгы өчен югары квалификацияле кадрлар әзерләүне максат итә. Әлеге бурычны тормышка ашыру өчен Хөкүмәт тарафыннан безгә ремонт эшләре алып барырга 100 млн.сумнан артык акча һәм кирәкле җиһазлар, җайланмалар алырга 50 млн.сум тирәсе акча бүлеп бирелде,- ди Николай Егоров.

Көллият директоры урынбасары Геннадий Сорокин белән һәр участокта булып чыктык. “Киләсе уку елын яңартылган корпуста, остаханәләрдә һәм тулай торакта башлап җибәрәчәкбез“,- диде ул. Биниһая күп күләмдәге эшләрне “Инвесттөзү“  хезмәткәрләре башкара. Әлеге оешманың 60лап кешесе шушы объектка җәлеп ителгән. Моннан тыш, студентлар һәм көллият хезмәткәрләре дә кулдан килгәнчә ярдәм күрсәтә. 

Уку йортының стеналары һәм ишек-тәрәзәләре генә түгел, электр, җылылык, су, канализация линияләре, шулай ук бүлмәләрдәге җиһазлар, кирәкле җайланмалар барысы да яңартылачак. “3Д“ форматындагы уку платформасы, техник иҗат өчен аерым бүлмә- барысы да югары квалификацияле белгечләр әзерләү өчен.  Югары технологияле импорт җиһазларга басым ясалганлыктан, педагогларның үзләренә дә өстәмә укырга туры киләчәк. 

-Дөресен генә әйткәндә, бу ремонт кына түгел, ә биналарыбызга яңа сулыш өрү. Реконструкциядән соң уку йортының икенче тормышы башланачак, дип тә әйтергә була. 25 ел буе төзекләндерү булмады бит. Эш монда гына да түгел. Шартлар тулысынча яхшыра. Мәсәлән, тулай торакны гына алганда да анда янгын куркынычсызлыгы буенча бик күп кимчелекләр бар иде,- ди Николай Егоров.

Бу уку елында көллияттә 446 кеше урта һөнәри белем ала. Киләчәктә аларның саны тагын да артачак. Студентларның 360-ы тулай торакта яши.  Реконструкциядән соң ул  450 кешене сыйдырачак. Зур кунаклар өчен ВИП бүлмәләр дә әзерләнә. 5нче катны инде әзер дияргә дә мөмкин. Элек монда яшәп киткәннәр ремонттан соң килсә, танымаячак та. Тар һәм караңгы коридорларны җимереп, иркен һәм якты итеп эшләгәннәр. Бүлмәләр дә заманча. Иң мөһиме- малайлар һәм кызлар катларында да душлар эшли башлаячак. Кайнар суы да була. Аскы катларда тренажер залы, уку һәм компьютер бүлмәләре, актлар залы эшләргә ниятлиләр.

Барлык эшләр дә август ае урталарына төгәлләнәчәк. бинаны кулланылышка тапшыру тантанасына республика җитәкчелеген дә көтәләр.