Мамадыш муниципаль районы

Шәһәрнең тышкы кыяфәте- ул безнең дә йөзебез

2015 елның 27 апреле, дүшәмбе

Шәһәрнең тышкы кыяфәте- ул безнең дә йөзебез. Соңгы елларда Мамадыш күзгә күренеп матурлана һәм һәркем әлеге тенденциянең үзгәрмәвен телидер. Оешма-предприятие коллективлары уздыра торган хезмәт өмәләре бу юнәлештә мөһим роль уйный. Әмма шәхси секторның да активлашуы зарур. Бүген шәһәребез территориясендә чисталык буенча вәзгыять нинди соң?

Күп кенә мамадышлылар фикеренчә, безнең район санитар-экологик яктан яхшылар рәтендә. Хезмәт коллективлары да территорияләрне чистарту максатыннан даими рәвештә өмәләр үткәрәләр.

-Шәһәребезне бик тә чиста дип әйтер идем. Башка җирләрдә дә шулай булса тагын да яхшы булыр иде,- дип сөйләде Әлфия Сархиева.

Мамадыштагы чисталыкны без дә бәяләргә булдык. Рейдка чыгар алдыннан санкцияләнмәгән чүплекләр табу максаты юк иде. Әмма алар үзләре үк каршыга чыктылар дип әйтергә мөмкин. Ушмааръягы өлешендә күпердән чыгуга чүп өеме күзгә ташланды. Бу элекке торак йорт урыны. Мондый участоклар бер генә түгел икән. Бигрәк тә арткы урамнарда әлеге күренешкә еш юлыгасың. Төрле шешәләр, упаковкалар, пакетлар... барысы да очрый.

Нәсимә Сарафилова йортлары янәшәсен даими чистартып тора икән. Башкалар да активлашса, өмәләр уздырсалар шәһәребез тагын да күркәмләнер иде,- ди ул.

Сәфәребезне дәвам итеп, тагын берничә чүплеккә юлыктык. Калдыклар өеме шәһәр мунчасыннан ерак кына булмаган чокырда, боз сарае астындагы күпер астында бар. Бу тулы исемлек түгел әле. Людмила Актаева сүзләренчә, проблеманы уңай якка үзгәртү кешеләрнең үзләреннән тора.

-Карап торасың, кайбер кешеләр урамга, тиеш булмаган урыннарга чүп ташлап китүне гадәти әйбергә генә саный. Иң мөһиме- үз капка төбе генә чиста булсын. Алай ярамый бит инде,- ди Людмила Актаева.

Тагын бер проблема- капка төпләрендә рөхсәтсез килеш төзелеш материаллары өелеп тора. Моның өчен штраф каралган булуын да еш хәбәр итәбез югыйсә. Материалларны вакытлыча саклау өчен яшәү урыны буенча җирле үзидарәгә барып белешмә алу шарт. Ул чагында штраф салынмаячак.

Шулай ук каты көнкүреш калдыклары контейнерларына бакча чүпләрен чыгару да катгый тыела. Моның өчен 2-3 мең сум күләмендә штраф каралган.

Санкцияләнмәгән чүплекләргә юлыксагыз, кичекмәстән хәбәр итүегезне сорыйбыз. Телефон номеры- 3-31-26.

БАРЛЫК ЯҢАЛЫКЛАРНЫ УКУ