Юлчылар ярышты

Мамадыш юлчылары беренче! Сүз якташларыбызның спорттагы уңышлары хакында. Безнең район бу көннәрдә “Татавтодор“ ААҖ кубогына мини-футбол бәйгеләрен кабул итте. Теманың дәвамы- алдагы видеоязмада.

Түбән Ушма авылындагы “Дуслык“ спорт комплексында чираттагы республикакүләм бәйге узды. Бу юлысы төбәгебез территориясендә “Татавтодор“ ААҖ беренчелегенә мини-футбол ярышы оештырдылар. Төп кубок өчен көрәшергә әлеге оешманың филиалларыннан килгәннәр иде. Барлыгы 11 команда җиңүче исемен ачыклады.

Сүз уңаеннан шуны да әйтәсе килә, “Татавтодор“ның Мамадыш филиалында спорт, сәламәт яшәү рәвеше алып баруга зур игътибар бирелә. Оешма шәһәрдәге учрежденияләр арасында узучы спартакиада да актив катнаша, күп кенә төрләрдән әлеге коллектив вәкилләре призлы урыннарны яулыйлар. Аеруча мини-футбол буенча юлчыларыбыз лидерлар рәтендә йөри. Быелгы чемпионатта да алар беренче өчлектә иде.

Башка район һәм шәһәрләрдән килгән хезмәттәшләре алдында да якташларыбыз сынатмадылар. Көндәшләренә каршы үткәргән очрашуладан күренгәнчә, юлчылар арасында иң көчле футзалчылар нәкъ менә Мамадыш районында. Моны нәтиҗәләр дә исбатлый. Финалга кадәр безнекеләр бер генә очрашуда да оттырмады. Ә беренче һәм икенче урыннар өчен үткәрелгән уенда безнекеләрнең көндәше Саба филиалы футзалчылары иде. Аларның капкасына якташларыбыз 4 җавапсыз туп кертү бәхетенә иреште. Шул рәвешле, алар турнирның төп бүләге-кубокны яуладылар.

3нче һәм 4нче урыннарны билгеләр өчен Апас һәм Яр Чаллы спортчылары очрашты. Нәтиҗәдә, апаслылар көндәшләреннән өстен чыктылар.

Турнир азагында иң яхшы уенчылар да билгеләнде. Мамадыш филиалыннан Айнур Гайфетдинов лидерлар исемлегендә.