“Созвездие-Йолдызлык-2015”

Мамадышның яшь талантлары туган ягыбызга дан һәм шөһрәт алып кайтты. Казанда “Созвездие-Йолдызлык-2015” Ачык республика телевизион эстрада сәнгате яшьләр фестивале суперфиналы искиткеч гала-концерт белән тәмамланды. “УНИКС” мәдәни-спорт комплексында узган концертта 1,2 һәм 3 нче урыннар өчен бүләкләр тапшырылган һәм конкурс лауреатлары махсус призлар белән бүләкләнгән. Гран-при иясе фестивальнең икенче гала-концертында – 25 нче апрельдә “Пирамида” мәдәни-күңел ачу комплексында мәгълүм булачак. 

15 нче юбилей фестиваленең быелгы үзенчәлекләренең берсе – лауреатлар һәм җиңүчеләр саны 156 га кадәр арткан, чөнки һәр номинациядә жюри берничә икенче һәм өченче урыннарны билгеләгән.

Искәртеп узыйк: фестивальнең финал этаплары 13 нче апрельдән 16сына кадәр “УНИКС” та үтте. 4 көн эчендә жюри әгъзалары 4,5 меңнән артык баланың чыгышын караган. Быел фестивальгә Чиләбе, Әстерхан, Ульяновск өлкәләреннән, Удмуртия, Марий Эл Республикаларыннан, Мәскәү шәһәреннән дә катнашучылар килгән.

Яшь талантларыбыз әлеге фестивальдә дан-шөһрәт казандылар. “Каприз” хореография төркеме 3нче урынга лаек булды. Җитәкчесе Тәнзилә Әхмәдуллина. Район сәнгать мәктәбе укучысы Алисә Хәсәншина “Венский вальс” дип исемләнгән җыр белән шулай ук өченле урынга лаек булды. Аның җитәкчесе Ольга Хәсәнова. 

“Пирамида” күңел ачу комплексы сәхнәсендә “Кристалл” бию төркеме, конферанс буенча Дмитрий Пономарев һәм җырчы кызыбыз Гүзәл Хәйриева чыгышлары бәяләнәчәк.