Мамадыш муниципаль районы

Эшлекле киңәшмә

2015 елның 24 апреле, җомга

21 апрельдә, республиканың муниципаль бергәлеге ил муниципалитетлары белән бергә үзләренең һөнәри бәйрәмнәре - Җирле үзидарә көнен билгеләп үтә. Район башлыгы Анатолий Иванов барлык җитәкчеләр катнашында үткәрелгән эшлекле киңәшмәне ачып, әлеге тармакта хезмәт куючыларны тәбрикләде, эшләрендә зур уңышлар теләде.

Район башлыгы Анатолий Иванов хакимият бинасының утырышлар залында узучы киңәшмәне ачып, муниципаль берәмлек җитәкчеләрен һәм җирле хакимият белгечләрен, вәкиллекле органнар депутатларын һәм үз шәһәре, бистәсе, авылы өчен хезмәт куючыларны һөнәри бәйрәм белән котлады. Җитәкче әйтүенчә, бүгенге көндә муниципалитетларның дәүләт хакимият органнары белән тыгыз хезмәттәшлеге ярдәмендә республикада һәм районда күп эшләр башкарыла.

Сүз уңаеннан, төбәгебезнең Сон, Усали һәм Түбән Тәкәнеш авыл җирлекләре башлыклары Казан шәһәрендә Җирле үзидарә көне уңаеннан әзерләнгән тантаналы чарада катнашып, бүләкләр алдылар.

Киңәшмәнең эшлекле өлешен ачып “Мамадышнефтьпродуктлары“ оешмасы җитәкчесе Илгизәр Ибраһимов чыгыш ясады. Ул узган ел дәвамында ирешкән күрсәткечләр һәм быелга планнар белән таныштырды. Шунысын искәртү мөһим, җәмгыять 2014нче елда 1млн. 300 мең сумнан артык күләмдә хәйрия ярдәме күрсәткән.

Шулай ук “Транспорт“ җәмгыяте башлыгы Фәрит Сибгатуллин да хисап тотты. Коллективның узган елда чиста кереме 500 мең сумны тәшкил иткән.

Эшлекле чарада аеруча санитар экологик ике айлык кысаларында башкарылырга тиешле эшләргә басым ясадылар. Район башлыгы искәртүенчә, авыл җирлекләре һәм шәхси секторның да активлашуы сорала.

Яз җитеп, аяк аслары кибә башлауга янгын куркынычсызлыгы темасы да беренче урынга чыга. Илнең көнчыгышындагы фаҗигане һәрберебез диярлек күзәтеп торабыз. Республикадагы урман зонасының 30% өлеше Мамадыш районына туры килүен дә искә алсак, бу мәсьәләгә берәү дә битараф калырга тиеш түгел.

Киңәшмәдә катнашучыларны “Таттелеком“ ААҖ-нең Мамадыш РУЭСы яңа җитәкчесе белән дә таныштырдылар. Бүгенге көннән коллективны Рәмис Рәсүл улы Дәминов җитәкли. Моңа кадәр әлеге вазыйфаны башкарган Юрий Неумоин лаеклы ялга китте.

Рәмис Дәминов соңгы елларда шушы коллективта җитәкче урынбасары булып эшләгән. Элемтә тармагында 1998нче елдан. Гаилә хәле- өйләнгән. Ике бала тәрбиялиләр.

БАРЛЫК ЯҢАЛЫКЛАРНЫ УКУ