Татарстанның беренче Президенты кубогы Мамадышка кайтты

16-18 апрель көннәрендә Актаныш төбәге яшь көрәшчеләрне кабул иткән иде. Биредә 1999-2001 елгы үсмерләр Татарстанның беренче Президенты Минтимер Шәймиев кубогына 15нче тапкыр бил алыштылар. Әлеге турнирның тарихи үткәне бар. Заманында үз җирлегендә үткәрелү белән башланган бәйге тора-бара республика белән генә чикләнми торган чын спорт тамашасына әйләнде. Быелгы ярышта 46 командадан килгән үсмерләр бил алыштылар. Актаныштан безнең көрәшчеләр гомумкоманда беренчелеген отып кайтты. Узган ел да безнекеләр шушындый уңышка иреште. Турнир тарихында мамадышлыларның 2 мәртәбә икенче һәм бер тапкыр 3нче урынны яулаганнары бар. Баш тренер Рафаэль Хәмидуллин әйтүенчә, быелгы бәйгеләргә районыбыздан ике команда барган. Пьедесталга 1999нчы һәм 2000нче елларда туганнар күтәрелде. Шәһәрдәге 4нче санлы мәктәптән Раил Хәбибрахманов белән 3нче мәктәптә укучы Рөстәм Ханов әлеге турнирда икенче ел рәттән беренче урынны яуладылар. Югары Ушма мәктәбендә белем алучы Данис Хәкимов 70 килограммга кадәрге үлчәү категориясендә шулай ук җиңүгә иреште. Аның авылдашы Илшат Галимбәковның мондый дәрәҗәдәге бәйгеләрдә тәүге мәртәбә генә катнашуы. Шулай булуга карамастан, ул 65 килограммга кадәрге авырлыкта финалда гына оттырып, пьедесталның икенче баскычына күтәрелә.