Татарстан Республикасы җирле органнарының мобилизация эшләре һәм запастагы гражданнарны броньлау мәсьәләләренә багышланган киңәйтелгән утырыш

Аерым бер чорда Мамадыш шәһәре һәм районыбыз Казан белән Алабуга шәһәрләреннән эвакуцияләнгән 58 меңнән артык кешене кабул итеп, аларны урнаштырырга тиеш була. Бу хакта Татарстан Республикасы җирле органнарының мобилизация эшләре һәм запастагы гражданнарны броньлау мәсьәләләренә багышланган киңәйтелгән утырышта җиткерделәр. Аның эшендә ТР премьер-министрының беренче урынбасары Алексей Песошин да катнашты.

14-15 нче апрель көннәрендә Мамадыш районында ТР ның җирле үзидарә органнарының мобилизация эшләре белгечләрен мобилизация җыеннарына әзерләү узды. Төбәгебезгә Татарстан Республикасы районнарының башкарма комитетлары җитәкчеләре, җирле органнарның мобилизация эшләре буенча белгечләре җыелган иде. Соңгы елларда әлеге чараның болай зурлап җөмһүриятебез күләмендә уздырылганы булмаган.

Иң элек кунаклар муниципалитет бинасында эш планы белән таныштылар. Биредә сәламләү сүзе белән район башкарма комитеты җитәкчесе Илнар Хафизов чыгыш ясады. Мобилизация җыеннарын оештыру хакында тулырак Татарстан Республикасы Министрлар Кабинеты Аппаратының икенче бүлек җитәкчесе Алексей Огородников сөйләде. 

-Разведка мәгълүматлары буенча республикадан якынча 400 кешелек батальон һәм 30 берәмлек техника мобилизацияләнәчәк. Төп авырлык нигездә ун муниципаль берләшмә җилкәсенә төшә,- диде Алексей Огородников.

Ике көнгә сузылган җыеннар вакытында мобилизация, эвакуация, территориаль оборона, өстәмә хастаханә койкаларын булдыру, матди-техник тәэмин ителешне оештыру, халыкны нормалаштырылган азык-төлек белән тәэмин итүгә күчерү һәм башка күп кенә мәсьәләләр каралды. Мобилизация җыенында катнашканнар өчен дистәгә якын күрсәтмә дәресләр уздырылды. Һәр дәрес видеорорликлар, стендлар белән баетылган иде.

-Мамадышлылар әлеге биремгә җитди әзерләнгән. Күп кенә материал эшләгәннәр, өйрәнгәннәр. Башка төбәкләрдән килгән хезмәттәшләре өчен дә файдалы мәгълүмат шактый,- диде Алексей Огородников.

Ике көн дәвам иткән чараның киңәйтелгән утырышында Татарстан Республикасы премьер-министрының беренче урынбасары Алексей Песошин, ТР Куркынычсызлык Советы секретаре Айрат Шәфигуллин, Татарстан Республикасы Министрлар Кабинеты Аппаратының икенче бүлек җитәкчесе Алексей Огородников, Татарстан Республикасы хәрби комиссары Сергей Погодин, районыбыз башлыгы Анатолий Иванов та катнаштылар.

-Мобилизация эшләре буенча җаваплы булганнарның атна саен диярлек алышынып торуы нәтиҗәсендә, кайбер районнар кызыл зонага керделәр. Бу бик тә катлаулы һәм җаваплы хезмәт. Биредә югары квалификацияле белгеч таләп ителә. Шуңа да әлеге тармакка кадрлар сайлаганда игътибарлы һәм таләпчән булырга кирәк,- диде Айрат Шәфигуллин.

Җыеннар барышында искәртүләренчә, аерым бер чорда Мамадыш шәһәре һәм Мамадыш районы башкалабыз Казаннан һәм Алабугадан эвакуцияләнгән 58 меңнән артык кешене кабул итеп, аларны урнаштырырга тиеш. Эвакуцияләнгәннәрне каршы алу, кабул итү, вакытлыча урнаштыру, торак пунктларын бүлү һәм озату өчен шәһәребездә 17 авыл җирлегендә 20 кабул итү эвакуация пунктлары оештырыла. Алар өчен җаваплы кешеләр дә билгеләнгән. Эвакуацияләү чараларын тәэмин итү максатында унөч гражданлык оборонасы хезмәте оештырылган. Шул ук вакытта медицина, транспорт, инженерлык, юл, коммуналь хезмәтләр белән бәйле чараларның да планы эшләнгән. Мобилизация җыенына әзерләнгән видеороликлардагы сюжетлар да югары бәяләнде.  

-Тулысынча алганда, эш начар оештырылмаган. Әмма кимчелекләр дә юк түгел. Аларны кичекмәстән төзәтергә кирәк. дөньядагы тотрыксызлык чорында бу юнәлеш аеруча мөһим,- диде Алексей Песошин.

Соңыннан Татарстан Республикасы җирле органнарының мобилизация эшләре буенча активлык күрсәткән бер төркем белгечләрнең активлыгы рәхмәт хатлары һәм бүләкләр белән билгеләп үтелде.