Мамадыш муниципаль районы

Административ комиссия рейдка чыкты

2015 елның 14 апреле, сишәмбе

Район башкарма комитетының административ комиссиясе санитар-экологик икеайлыкның үзәгендә кайный. Авыл җирлекләре буенча рейдларны башлап та җибәрде алар. Аның беренчесе Тау иле төбәгендә оештырылган иде. Чираттагы сәфәр Усали зонасында.

Район башкарма комитетының административ комиссиясе чираттагы рейдын Катмыш һәм Урманчы авыл җирлекләренә үткәрде. Баскан, Катмыш, Еники-Чишмә авылларында, Новый, Җәнлек совхозы, Кама урманчылыгы бистәләрендә, барлыгы 7 торак пункта булды алар. Шушы төбәкләрдә урамнарның һәм территорияләрнең чисталыгын тикшереп чыктылар. Комиссия вәкилләре тарафыннан, торак пунктларның төзеклеге кагыйдәләрен бозган өчен 8 кешегә беркетмәләр төзелде, тагын ике кешегә кисәтү ясадылар.

Билгеле булганча, бүгенге көндә әлеге төр административ хокук бозулар өчен физик затларга 2 мең сумнан башлап, җаваплы затларга 15 мең сумнан башлап һәм юридик затларга 200 мең сумнан башлап штрафлар каралаган. Кагыйдә бозулар икенче тапкыр кабатланса, штрафларның күләме бермә-бер арта.

Комиссия рейдларын башка авыл җирлекләре буенча да үткәрәчәк. Графиклары район башлыгы тарафыннан расланган. Бүген мәсәлән, мондый чара шәһәр буенча узды.

Халыкка бер генә киңәш бирәсе килә: капка төпләрен ешрак җыештырып торсыннар иде. Төзелеш башлагансың икән, материалларыңны вакытлыча урамга урнаштырып торырга авыл яки шәһәр җирлекләреннән белешмә алсаң, берәү дә беркетмә тутырмаячак һәм штраф салмаячак.

БАРЛЫК ЯҢАЛЫКЛАРНЫ УКУ