Мамадыш муниципаль районы

Сингапурча укыту узды

2015 елның 14 апреле, сишәмбе

Бу көннәрдә шәһәребезнең 1нче санлы мәктәбендә методик атналык үтә. Аның кысаларында барлык дәресләрне дә диярлек Сингапурлыларның укыту ысулын кулланып уздыралар. Аерым бер көнне чараларга кунак буларак әти-әниләр дә чакырулы иде.

Соңгы вакытта Татарстан Сингапур мәгарифенә йөз тота башлады. Халыкара рейтинглар буенча әлеге республика байтактан инде мәктәпләрдә белем бирү үсешендә алдынгылардан санала. Яңа алымны безнең районда да кулланалар.

Шәһәребезнең 1нче санлы мәктәбе Сингапурлыларның укыту ысулын инде 2нче ел файдалана. 6нчы апрельдән 11енә кадәр дә уку йортында методик атналык игълан ителде. Аның кысаларында барлык чаралар да Сингапур ысулын кулланып әзерләнгән.

Атналык кысаларында көндәлек план төзелгән. Мәсәлән, дүшәмбе теоретик семинарлар үткәргәннәр, сишәмбе утырышлар, ә чәршәмбе класстан тыш чаралар көне иде. Кичәге көн әлеге уку йортында аеруча үзенчәлекле үтте. Ул алдан ук укучыларның ата-аналары өчен ачык ишекләр көне, дип игълан ителгән. Алар дәресләрдә катнашып, яңача укыту ысулы белән таныштылар, балаларының дәресләрдә үз-үзләрен тотышларын, белем дәрәҗәсен бәяләделәр.

“Сингапур система”сы дөньяның, шул исәптән совет мәктәбенең иң алдынгы укыту технологияләрен үзенә җыйган. Гомумән алганда, сингапурча укыту ысулларының үзенчәлеге укучыларны аралашу, хезмәттәшлек һәм критик фикерләүгә нәтиҗәле өйрәтүдә, ди белгечләр. Аларда укучыны төрле яклап үстерү, тормышка өйрәтү күздә тотыла.

Беренче санлы мәктәп коллективы үз тәҗрибәсен еш кына башка уку йортлары белән дә уртаклаша. Бүген методик атналык кысаларында әлеге мәгариф учреждениясендә республика семинары узды. Иртәгә Сингапур республикасыннан да кунаклар килүе көтелә.

БАРЛЫК ЯҢАЛЫКЛАРНЫ УКУ