Мамадышта КФУ көне

Мамадышлылар Алабуга кунакларына эйфель манарасын бүләк итте. Символик сувенирны район башлыгы Анатолий Иванов КФУ-ның Алабуга институты директоры Елена Мерзонга тапшырды. Тантаналы чара төбәгебезнең төп тамашалар залында уза. Бирегә Татарстанның иң мәртәбәле югары уку йортларының берсе булган әлеге ВУЗ вәкилләре мәктәп укучылары белән очрашуга килгән иде. Шунысын да искәртү мөһим, мондый чаралар инде беренче тапкыр гына үткәрелми.

Мамадыш районының барлык мәктәпләреннән дә диярлек укучыларны бер залга җыйган әлеге чара “Тормыш дәресләре“ муниципаль проекты кысаларында оештырыла. Ул ике блоктан гыйбарәт иде. Иң элек 1-4нче сыйныфлар укучылары, ә бераз соңрак өлкән класстагылар белән очраштылар. Профориентлашу буенча эш кече яшьтән үк алып барылырга тиеш,- ди оештыручылар. Мамадышлыларга лекцияне КФУның Алабуга институты педагоглары укыды. Укучылар аларны зур кызыксыну белән тыңлады, сораулар да бирделәр. Дәресләрнең темасы- “акыллы йорт“ һәм “вундеркиндлар“ иде.

Акыллы йорт электроникадан ясалган. Шунысы сөенечле, хәзер программалаштыруны барлык укучылар да диярлек үзләштерде. Фойеда әзерләнгән күргәзмә моның ачык мисалы. Бу эшләрнең авторлары икенче санлы лицейда белем ала. Эрик Вәгыйзов һәм Илсаф Хуҗәхмәтов бу төрдәге конкурсларда лауреат исемнәрен дә яуладылар.

Күргәзмә белән укучылар гына түгел, ә КФУның Алабуга институты директоры Елена Мерзон җитәкчелегендәге кунаклар делегациясе дә таныша. Аларны аеруча 19нчы гасырда нәшер ителгән китап күргәзмәсе әсир итә. Җыентыклар арасында бөек рус язучысы Александр Пушкинның кулъязмалары да бар.

Әлеге чараның икенче өлеше чыгарылыш сыйныф укучылары, булачак абитуриентлар өчен үткәрелде. Алабуга институты мөгаллимнәре һәм студентлары Россиянең иң яхшы югары уку йортларының берсе булган әлеге учреждение, аның яшәеше хакында сөйләделәр. Очрашуны оештыручылар әйтүенчә, мондый әңгәмәләр укучыларга һөнәр сайлаганда зур ярдәм күрсәтә, аларның сайлау мөмкинлеге арта. 

Институт директоры уку йорты үсешенә өлеш керткән педагогларга рәхмәт хатлары да тапшырды.

Бүген КФУның Алабуга институтында 40 артык юнәлеш буенча белем алырга мөмкин. Анда укучы 4500 студентның 365 мамадышлылар. Чыгышы вакытында район башлыгы Анатолий Иванов ассызыклаганча, төбәгебез мөгаллимнәренең күпчелеге нәкъ менә шушы ВУЗны тәмамлаган. “Яхшы белгечләр әзерләвегез өчен рәхмәт сезгә“,- диде Анатолий Иванов. Кунакларга истәлек бүләге итеп эйфель манарасын тапшырды ул.

Елена Мерзон үз чиратында мондый очрашулар һәм кунакчыллык өчен район җитәкчелегенә рәхмәт белдерде.

-Безнең Мамадышта мондый очрашуны беренче генә үткәрүебез түгел. Идеябезне Анатолий Петрович һәрвакыт хуплап каршы ала. Бик матур каршы алалар. Укучылар өчен дә бик файдалы чара дип исәплибез. Каяндыр ишеткәнче, үз күзләрең белән күрү, үзең ишетү яхшырак бит,- диде Елена Мерзон.

Институт шәкертләре Мамадышка үзенчәлекле концерт программасы белән килгән иде. Студентлар арасында якташларыбыз да шактый. 

Очрашу кысаларында югары уку йортына багышлап әзерләнгән фильм да күрсәтелде. Сүз уңаеннан, 19нчы апрель көнне Алабуга институты ачык ишекләр көне үткәрә.