Мамадыш муниципаль районы

“Лицейчы” бәйрәме

2014 елның 29 октябре, чәршәмбе

Лицейчыларның саны 79 га ишәйде. Традицион бәйрәмдә беренче сыйныф укучыларына шаһәдатнәмәләр тапшырдылар. Шәһәрнең икенче санлы уку йортында оештырылган чара бу һәм башка тантаналар белән истә калачак.

Кыллы һәм тынлы уен колларын оста иярләүче оркестр, аның көйләренә талгын биюләр, флэшмоб, җыр-моңнар, уеннар, татлы мамык, поп-корн, тәмле камыр ризыклары, җиләк-җимеш. Боларның барысын да шәһәребезнең икенче санлы лицеенда тамаша кылу, татып карау мөмкин иде. 2008 нче елда рәсми төстә икенче санлы белем бирү йортына лицей статусы бирелгән көннән башлап ел саен “Лицейчы” бәйрәме оештырыла.

Бәйрәм рухы белән сугарылган көннең кабатланмас мизгеле, ул да булса, беренче сыйныф укучыларын лицейчылар сафына кабул итү. Агымдагы елда уку йортында беренчеләрнең саны 79 тигез. “Белем дөньясына тәүге адымнарын алар кыю атладылар, киләчәктә дә лицейның йөзенә кызыллык китермәсләр”,– диде директор урынбасары Гүзәл Чанышева. Беренчеләр исә әлеге өметләрне акларга ышандырып вәгъдә бирделәр. Һәр беренче сыйныф укучысы лицейчы шаһәдатнәмәсенә лаек булды.

Сүз уңаеннан, элекке заманда дворяннар балаларын пансионнарга биреп укытканнар. Бөек Пушкинны да лицей тәрбияләгән. Лицейда укучылар биредә белем алулары белән чын күңелдән горурланалар.

Сүз уңаеннан, 4 нче сыйныф укучысы Булат Заһитовның абыйсы да шушы белем йортын тәмамлаган. Шушы ук гаиләдән янә бер бала 3 нчы сыйныфта белем ала.

БАРЛЫК ЯҢАЛЫКЛАРНЫ УКУ