Мамадыш муниципаль районы

“Татарский deluxe” “Алтын көз–2014” агросәнәгать күргәзмәсеннән алтын медаль белән кайтты

2014 елның 28 октябре, сишәмбе

“ПРОСТО МОЛОКО” идарәче компаниясе" ҖЧҖнең “Мамадыш сыр–май комбинаты” “Алтын көз–2014” агросәнәгать күргәзмәсеннән алтын медаль белән кайтты. Мәскәүдә узган чарада безнекеләр “Татарский deluxe” сырын тәкъдим иткән иде. Бүген безнең иҗат төркеме әлеге төр продукцияне җитештерүчеләр янында.

Бүгенге көндә Татарстанда мондый төрдәге 9 завод эшләп килә. “Мамадыш сыр–май комбинаты” җитештергән продукциясенең күләме һәм сыйфаты ягыннан лидерлар рәтендә. Коллективта 280 хезмәткәр исәпләнә. Эш 12шәр сәгатьле 2 сменада оештырылган. Тәүлеккә уртача 200 тонна сөт эшкәртәләр. Җәй айларында бу сан 300 тоннадан артып китә. Җыелган сөтнең 40 % Мамадыш районы хуҗалыкларыннан, ә калган өлешен Киров өлкәсе һәм Удмуртия республикасыннан ташыйлар.

Коллектив зур тәҗрибәгә ия. Хезмәткәрләр арасында 30 елдан артык шушы оешмада эшләүчеләр шактый.

“Просто молоко” идарәче компаниясе" ҖЧҖнең Мамадыш май-сыр комбинаты быелның 9 аенда 4 мең 600 тонна сыр җитештергән. Бу узган елның шушы чоры белән чагыштырганда 121 %. Ел башыннан якынча 2000 тонна май җитештергәннәр. Үсеш 153 % тәшкил итә. 9 айда җитештерелгән товар продукциясенең күләме 1,3 млрд. сум.

Коллектив хезмәткәрләреннән төзелгән махсус комиссия көн саен продукциягә дегустация ясый. Мәсәлән, өстәлдә яңа төрдәге “Татарский делюкс” сырының 3 варианты бар. 2, 7 һәм 13 ай элек җитештерелгәннәре. Яңарак гына ясала башлаган әлеге ярым каты сыр, упаковкада өч елга кадәр саклана ала, аның кыйммәте торган саен арта гына бара икән.

“Алтын көз–2014” агросәнәгать күргәзмәсендә мамадышлылар нәкъ менә “Татарский делюкс” сыры белән катнашкан иде. Россиянең 55 төбәгеннән, шулай ук 24 чит ил оешмалары катнашкан чарадан “Просто молоко” идарәче компаниясе" ҖЧҖнең Мамадыш май-сыр комбинаты диплом һәм алтын медаль белән кайтты. “Сөт продукциясе” номинациясендә 670 эшләнмә катнашкан. Шул рәвешле, Мамадыш сыры Россиядә иң сыйфатлы булып кала.

БАРЛЫК ЯҢАЛЫКЛАРНЫ УКУ