Мамадыш районында зона семинар–киңәшмәсе узды

Авыл хуҗалыгы машиналарын кышкы саклауга дөрес итеп кую язгы кыр эшләренә әзерлекнең 30 % өлешен алып тора. Бу хакта “Тәкәнеш” агрофирмасы базасында үткән зона семинар–киңәшмәсендә искәрттеләр. Әлеге чара Мамадыш, Кукмара, Байлар Сабасы һәм Теләче районнары хуҗалыкларының баш инженерлары өчен оештырылды. ТР Авыл хуҗалыгы һәм азык–төлек министры урынбасары Тәлгать Таһирҗанов рәислек иткән семинар “Авыл хуҗалыгы машиналарын кышкы саклауга кую йомгаклары һәм 2015нче елгы язгы кыр эшләренә әзерлек” темасына багышланды. Анда катнашучылар иң элек Түбән Тәкәнеш мәдәният йортында тармактагы иң мөһим мәсьәләләрне анализлады, соңыннан агрофирманың машина–трактор паркында техникаларның кышкы саклауга куелышын, ремонт эшләрен бәяләделәр. Тәлгать Таһирҗанов белдерүенчә, авыл хуҗалыгы машиналары 1нче апрельгә кадәр тулысынча әзер булырга тиеш. Ә 15нче апрельгә кадәр аларга техник күзәтү уздыру шарт.