Мамадыш муниципаль районы

Маһиҗамал Вәлиуллинага 100 яшь тулды

2014 елның 21 октябре, сишәмбе

Маһиҗамал Вәлиуллинага 100 яшь тулды. Шәдче авылында гомер кичерүче якташыбыз зур бәйрәмен күтәренке кәеф белән каршы ала. Гасыр яшьтәше булуына карамастан, әле дә күп вакытын эш белән үткәрә ул.

Тумышы белән Урта Шүләңгер авылыннан булган Маһиҗамал әби бүген дә тормыш юлын барлык нечкәлекләре белән искә ала. Кечкенәдән ятим калган, урман эше, гаилә йөген тарту... Аларны бик теләгәндә дә онытып булмый ди ветеран.

–Әтием сугышта югалды. Аннан әниебез башка кешегә кияүгә чыгып китте. Мин абый тәрбиясендә үстем. Җиңги авырта иде, шунлыктан өйдәге күп эшләр минем җилкәгә төште. Шуның өстенә урман эшенә йөрдем,– ди Маһиҗамал Вәлиуллина.

9нчы октябрь көнне аңа 100 яшь тулды. Ул әле дә көр күңелле, сәламәтлегеннән дә зарланмый. Ә озак яшәүнең сере гап–гади икән.

–Озак яшәүнең сере сабырлыкта. Артык борчылмаска, кешене тикшермәскә кирәк. Теге кеше шул әйберне алган, дип бервакытта да көнләшмәдем, байлыкка кызыкмадым. Иң мөһиме– хезмәтне яраттым. Хәзер дә эшкә биреләм дә, барлык мәшәкатьләр онытыла,– ди.

Маһиҗамал әби Шәдче авылына Һадиулла исемле кешегә тормышка чыга. Иптәше гомер буе механизатор булып эшләгән. Төбәкнең беренче комбайнчысы. Вәлиуллиннар 6 бала тәрбияләп үстергәннәр. Гаилә башлыгы 1981нче елны вафат була. Бүген Маһиҗамал әбинең 10 онык һәм 13 оныкчыгы бар.

Юбиляр хәзерге көндә кызы Наҗия апа тәрбиясендә яши.

–Әниебез турында бик җылы сүзләр генә әйтә алам. Ул безгә яхшы тәрбия бирде. Иптәшем дә, сердәшчем дә, киңәшчем дә. Өй эшләрендә булыша. Мин кайтуга ашарга пешереп куя, керләргә хәтле юа. Әни, эшләмә инде, дим, тыңламый,– ди кызы Наҗия Хәлиуллина.

Бөек Ватан сугышы ветераны тылдагы хезмәтләре өчен күп кенә медальләр, мактау грамоталарына лаек булган. Аларны бик кадерләп саклый ул. Шуларны кулга алып, истәлекләрне барласам, яшьлеккә кайткан кебек булам,– ди юбиляр!

БАРЛЫК ЯҢАЛЫКЛАРНЫ УКУ