Түбән Ушмага файдалы тәҗрибә артыннан районыбызның авыл җирлекләре башлыклары килде

Түбән Ушмага файдалы тәҗрибә артыннан районыбызның авыл җирлекләре башлыклары килде. Исегезгә төшерәбез, биредә әле күптән түгел Авыл көне бәйрәмен үткәргәннәр иде. Ул чагында торак пунктта мәчет, мемориал–һәйкәл, ял паркы ачтылар. Семинарда катнашучылар әлеге үзгәрешләр белән танышты һәм башка мөһим мәсьәләләрне дә күтәрделәр.

Түбән Ушма буенча экскурсияне һава торышы кыскарта. Әмма төбәктәге иң соңгы үзгәрешләр белән җирлек башлыклары танышып чыгарга өлгерделәр. Реконструкциядән соң ачылган 110 еллык мәчет, Бөек Ватан сугышы ветераннары һәм тыл хезмәтчәннәре өчен куелган мемориал–һәйкәл, фонтанлы ял паркы, спорт комплексы...

“Бездә дә Мотыйгуллиннар булсын иде!”– дип шаярта катнашучылар. 

Ә мәктәп бинасында башка темалар хакында сөйләштеләр. Иң элек авыл хуҗалыгы өлкәсе анализланды. Районда сөт җитештерү күләме арта бара. Хәзер иң мөһиме– ирешкәннәрне саклап калу. Киләчәктә Мамадыш сөт җыючыларының эш бүлмәләре барлыкка киләчәк. Район башлыгы Анатолий Иванов алар өчен махсус урыннарны җиһазландырырга тәкъдим итә. Беренчедән, бу заман таләбе, икенчедән, тиешле шартлар булмаганда, продукциянең сыйфатына дөрес бәя куеп булмый. Хәзерге вакытта сөтнең куелыгын ачыкларга ареометрлар ярдәм итә. Анализны да урамда алалар. Сөт җыючыларны һичьюгы түбә астына кертергә кирәк, дип искәрттеләр.

Районыбызның 7 торак пунктында урамнарның яктылыгын тәэмин итү өчен аерым линия барлыкка киләчәк. Бу яңалыкны эшлекле чарадагыларга район башлыгы урынбасары Салават Гыймранов җиткерде. 2015нче елда “5нче проводны” Кече Кирмән, Югары Яке, Норма, Түбән Яке, Көек–Ерыкса, Шәдче, Яңа Комазан авылларында сузачаклар. Кирәкле материал инде кайтарылган.

Очрашу азагында авыл җирлекләре башлыклары имтихан тапшырды. Сынау компьютер грамоталылыгы белән бәйле иде. Нәтиҗәләрдән күренгәнчә, кайбер җитәкчеләр замана машинасы белән дус түгел икән. Җирлек башлыкларына махсус курслар тәмамларга тәкъдим ителде.