Мамадыш муниципаль районы

“Җиңүле май” проекты башланып китте

2014 елның 21 октябре, сишәмбе

Шәһәр оешма–предприятиеләре командалары арасында да “Җиңүле май” проекты башланып китте. Сәнгать бәйгесенә стартны 2нче санлы лицей, 34нче санлы даруханә, спирт заводы һәм теркәү палатасы коллективлары бирә.

Илебезгә биш герой биргән Албай авылы каһарманнары, сугышка сигез малаен озаткан Урта Кирмәннең бөек анасы Фатыйха Әхмәдиева, блокадага эләккән Ленинградтан Соколкага кайтарылган балалар язмышы... Узган атнаның җомгасында мәдәният йорты сәхнәсендә районыбыз тарихында тирән эз калдырган әлеге вакыйгаларны күрсәттеләр.

Мәктәпне тәмамлаган Миллионлаган егет-кызларның матур хыялларын 1941нче елның 22нче июнь таңында Ватаныбыз ягына искән сугыш җиле юкка чыгара. Әлеге мизгелне коллективлар сурәтләгәндә залда битараф калган тамашачы булдымы икән.

Дүрт дистәдән артык кешедән торган хор башкарган җырны тыңлаганда да күп кенә тамашачыларның күзләренә яшь килде.

Албайда әле кичә генә печән чапкан халык икенче көнне сугышка үзенең булачак батырларын, Фатыйха апа улларын озата... Кышкы зәмһәрир салкыннарда хатын-кызлар Соколка урманнарында агач кисә, Ленинградтан үзләренә сыену урыны тапкан балалар... Авыл халкы алар белән соңгы телемнәрен бүлешкән.

Лицей коллективы әлеге кичәгә язмышлары сугыш чорлары белән бәйле кешеләрне дә чакырганнар иде. Сугыш вакытында әти-әниләре белән Высший Волочоктан күченеп килгән Нина Галочкина, татарлар арасында беренчеләрдән булып Советлар Союзы Герое исеменә лаек булган Гафият Нигъмәтуллинның кызы Гөлия апа Мөхәммәтҗанова, шәһәребез аксакалы, сугыш ветераны Вахит ага Галиев әнә шундыйлардан.

БАРЛЫК ЯҢАЛЫКЛАРНЫ УКУ