Мамадыш шәһәр Советының чираттагы егерме алтынчы утырышы узды

Шәһәр башлыгының урынбасары Ирек Гатауллин башка эшкә күчә. Хәзерге вазыйфасын ул 1нче ноябрьгә кадәр башкарачак. Бу хакта Мамадыш шәһәр Советының чираттагы егерме алтынчы утырышында мәгълүм булды.

Утырышның көн тәртибенә 5 мәсьәлә кертелгән иде. Депутатлар Мамадыш шәһәре территориясендә яшәүче гражданнардан үзара салым җыю, референдум үткәрү, төзекләндерү кагыйдәләренә үзгәрешләр кертү кебек сораулар буенча фикер алыштылар.  

Узган ел Татарстан Министрлар Кабинеты гражданнардан җыелган үзарасалым акчаларын бергә дүрт пропорциясендә финанслау турында карар кабул иткән иде. Республиканың егерме алты районында җирле власть органнары референдумнар үткәреп әлеге акчаны җыюны оештырдылар. Районыбыз авылларында да узды алар. Халыктан 3 миллион 200 мең сумнан артык акча җыелып, республикадан 13 миллион сумга якын акча килде. Авылларыбызда хәзер аларның барысын да алдан сөйләшеп куйган максатларга – юллар салуга, чишмәләрне ремонтлауга, зират коймаларын тотуга, урам яктылыгына файдаланалар. 

Шушындый ук референдумнар шәһәрләрдә дә үткәрергә рөхсәт ителә икән. Әлеге утырышта үзарасалым акчасы җыюны оештыру буенча референдум үткәрү мәсьәләсе каралды. Ул яңа мөселман зиратын ясап бетерүгә, православие зиратын киңәйтүгә тотылачак. Күләме авыллардагы кебек үк – 200 сум итеп билгеләнде. Ул 18 яшьләре тулганнардан гына җыелачак. Андыйлар шәһәребездә 11703 кеше. Депутатлар үзарасалым акчасын беренче төркем инвалидлардан һәм Бөек Ватан сугышы ветераннарыннан җыймаска дип карар иттеләр. Алар – 134 кеше. Акча 11569 кешедән җыелса, барысы 2 миллион 313 мең 800 сум тупланачак. Моңа Татарстан хөкүмәте 9 миллион 255 мең 200 сум өсти. Шулай итеп, безнең акчалар 11 миллион 569 мең сумга кадәр үсә. 

– “Мамадыш” совхозы бистәсе ягында ясалучы яңа мөселман җиратының 675 метр коймасын тотып бетерергә, бер километр килү юлын салырга, эчендә 400 метр үзәк юлын эшләргә һәм 2-3 метр киңлектә бер километр 200 метр тротуарлар ясарга кирәк. Православие зираты зурайтыла. Анда тагын 700 метр койма тоту, үзәк юлын озынайту, тротуарларын ясау планлаштырыла, – диде шәһәр башкарма комитеты җитәкчесе Рәшит Гарипов.

Әлеге акчаларның тотылышын салым органнары да, прокуратура да, башкалар да тикшереп торачак. Бер сумы да читкә китмәячәк,– дип хәбәр иттеләр.

Референдум 7нче декабрьгә билгеләнде. Шундый ук референдумнар Урманчы һәм Соколка авыл җирлекләрендә дә үткәрелә. Үзарасалым акчаларын нинди максатларда тотачакларын алар үзләре хәл итәчәк.