Танк биатлонында җиңү яулаган якташыбыз Ринат Һадиев белән очрашу

Танк биатлонында җиңү яулаган якташыбыз Ринат Һадиевка вакытыннан алда өлкән лейтенант дәрәҗәсе бирелде. Моннан тыш, ул районның иң зур бүләгенә лаек. Яшь геройга бәйле яңалыкларны мәдәният йортында узган очрашуда җиткерделәр.  

Яшьләребез чын характер күрсәтеп Россия күләмендәге һәм Халыкара масштабтагы танк биатлоннарында җиңү серләрен Мамадышыбызны бөтен дөньяга таныткан Ринат Һадиевның үзеннән ишеттеләр. Узган шимбәдә аның белән район мәдәният йортында оештырылган очрашу күчәсендә залда алма төшәрлек тә урын юк иде. Очрашу барышында егетләр генә түгел кызларның күзләреннән дә очкыннар сүнмәде. Узган ел ук, үзен Россиянең беренче танкисты итеп таныткач та, кумирларына әйләнгән, армиядәге хезмәт вазыйфаларына бәйле рәвештә, ел ярым инде Мамадышыбызга кайта гына алмаган иде ул. Әле кайчан гына Иделдә һәлакәткә очраган “Булгария” теплоходы пассажирларын үз бортына алып Роман Лизалин Мамадышыбызның данын күтәргән иде. Менә хәзер Ринат Һадиев исеме зәңгәр экраннардан яңгырый. Икесе дә 1нче санлы мәктәпне тәмамлаганнар икән. “Каһарман булып тумыйлар, каһарманга әйләнәләр”,– диде район башлыгы Анатолий Иванов. 

Анатолий Иванов Ринатның күкрәгенә “Мамадыш муниципаль районы каршындагы хезмәтләре өчен“ медален такты. 

  

Ринат турында әнисе Любовь Михайловна: “Беләкәй чагында шукланырга яратты, коймадагы кадакка асылынып калган чаклары да булды, хәрби булырга хыялланмады да”,– дип искә алды. 

Ринатның үзе әйтүенчә, ул кечкенә чагында бөтен малайлар кебек үк,  космонавт булырга хыялланган.  “Башка инде биатлонда катнаша алмаячакмын. Анда взвод командирлары гына катнаша. Мин хәзер – рота белән командалык итәм”,–диде ул. 

Республика хәрби комиссариатының район бүлеге җитәкчесе Андрей Синкевич Ринат Һадиевка, Россия Оборона министры боерыгы белән, вакытыннан элек өлкән лейтенант дәрәҗәсе бирелүен, рота командиры итеп билгеләнүен җиткерде, генерал-майор дәрәҗәсенә кадәр хезмәт итүен теләде. 

Районыбызның сәнгать осталары бу көнне тамашачылар өчен патриотик рухтагы чыгышлар бүләк итте.