Мамадыш муниципаль районы

Үзебезнекен сайла!

2014 елның 17 октябре, җомга

“Үзебезнекен сайла – Татарстанныкын сатып ал!” Бүгенге көндә әлеге шигарь янә актуаль. Чит ил продукциясенә чикләүләр кертү җитештерүчеләребезгә яңа мөмкинлекләр ачачак, ди белгечләр. Моннан тыш, үз товарларыбызның сыйфаты яхшы булуын да онытмаска кирәк.

“Радуга” ҖЧҖ 15 елдан артык ипи һәм икмәк–булка эшләнмәләре пешерү базарында эшли. Бүгенге көндә алар айга уртача 60–70 тонна продукция җитештерәләр. Җәмгыять ипи һәм күмәчләрнең 7 төрен пешерергә сәләтле. “Радуга” ипиен Мамадыш шәһәре һәм авылларына гына түгел, ә Алабуга төбәгенә дә илтәләр. Күрше районның уннан артык сәүдә ноктасында Мамадыш продукциясе сатыла.

–Киләчәктә географияне киңәйтергә дә планнар бар. Аның өчен беренче чиратта җитештерү күләмен арттыру шарт. Алга таба шуның өстендә эшләячәкбез,– ди “Радуга” ҖЧҖ директоры Рафаил Галиев.

Әлеге коллектив пешергән икмәк продукциясе барлыгы 200 артык сәүдә ноктасына таратыла. Җәмгыять канаты астында 52 хезмәткәр. Пешекчеләр ике сменага бүленеп тир түгә. Барысы да үз эшләренең осталары, ди җитәкчелек. Бу оешмада кимендә ун еллык тәҗрибәләре бар икән.

–Һәр сменада өчәр–дүртәр пешекче эшли. Заманча җиһазлар кулланабыз. Мичләр компьютерлаштырылган,– ди технолог Әлфира Идиятова.

Җәмгыять директоры Рафаил Галиев чит ил продукцияләренә чикләүләр кертүне уңай яктан гына бәяли. Аның фикеренчә, бу үз җитештерүчеләребезгә яңа мөмкинлекләр ачачак.

–Дөресен генә әйткәндә, мондый чикләүләр күптән кирәк иде инде! Сату нокталары чит ил әйберләре белән тулган иде. Аларның күбесенең кайда ясалганын бер үзләре генә белә. Ә үз товарыбыз сыйфатлы да, тәмле дә. Чикләүләрнең тагын бер уңай ягы– җиләк–җимеш үстерү кебек тармаклар аякка басачак,– ди Рафаил Галиев.

Җәмгыять уңышлары хакында бер кочак рәхмәт хатлары, мактау кәгазьләре сөйли. Шуларның соңгы берничәсенә тукталсак, коллектив “Россия Лидеры–2013” рейтингында җиңеп чыкты, халыкара эшмәкәрләр оешмасының мактау билгесен алды.

БАРЛЫК ЯҢАЛЫКЛАРНЫ УКУ