Мамадыш муниципаль районы

"дүшәмбе” киңәшмәсе

2014 елның 15 октябре, чәршәмбе

Күп кенә мамадышлылар өчен күптән көтелгән вакыйга! Бу атнаның шимбәсе, ягъни 18нче октябрь көнне Домолазов урамында төзелгән 8нче санлы күпфатирлы йорт кулланылышка тапшырылыр дип көтелә. Бу хакта “эшлекле дүшәмбе” киңәшмәсендә район башлыгы Анатолий Иванов хәбәр итте.

Муниципалитетның утырышлар залында узучы чара җиңүчеләрне тәбрикләү тантанасыннан башлана. Җомга көнне төбәгебезнең педагоглар командасы ТР укытучылары арасында оештырылган спартакиададан алтын медаль һәм кубок белән кайткан иде. Алар спортның 7 төреннән дә яхшы күрсәткечләргә ирештеләр. Команда 500 мең сум премиягә лаек булган.

Мәдәният өлкәсендә дә мактаулы хәбәр бар. Шаяннар, тапкырлар, мәзәкчеләр клублары арасында оештырылган “Татар лигасы” фестивалендә мамадышлылар 1нче урынны яулады. Бәйгедә барлыгы 11 команда катнашкан.

Чираттагы күңелле хәбәрне 4нче санлы мәктәп кадетлары алып кайтты. Алар Казанда үткәрелгән хәрби–патриотик уеннарда шулай ук беренче урынга лаек булалар.

Алга таба янгын куркынычсызлыгы хакында сөйләштеләр. 121нче санлы янгын сүндерү часте җитәкчесенең урынбасары Фәрит Филиппов һәм янгын күзәтчелеге бүлегенең өлкән инспекторы Павел Руднев быел искәртелгән күңелсез очраклар, аларны булдырмас өчен күрелергә тиешле чаралар хакында хисап тоттылар.

Фәрит Филиппов әйтүенчә, ел башыннан 28 янгынга чыкканнар. Бу узган ел белән чагыштырганда, бер очракка кимрәк. Ә менә ялган чакыртулар саны, киресенчә, бергә арткан.

Павел Руднев чыгышыннан күренгәнчә, янгын чыгу очраклары аеруча Соколка, Омар һәм Красная Горка авыл җирлекләре территориясендә еш теркәлә икән. Инспектор әлеге төбәкләрдә профилактика чараларын арттырырга тәкъдим итә.

Район башлыгы Анатолий Иванов беренче чиратта социаль өлкәгә караучы объектлардагы җитешсезлекләрне ачыкларга һәм бетерергә, дигән бурыч куйды. Халыкка милекне иминиятләштерү мөһимлеген дә аңлату зарур,– диде ул.

Киңәшмәдә Мамадыш районы сулыкларында куркынычсызлыкны тәэмин итү хакында да сөйләштеләр. 9 айга анализ белән кече суднолар буенча дәүләт инспекциясе вәкиле Айдар Галиәкбәров таныштыра. Аның әйтүенчә, ел башыннан су объектларында 3 кеше корбан булган. Бу узган елның әлеге чоры белән чагыштырганда, 7 очракка кимрәк. Күңелсез хәлләрнең барысы да рөхсәт ителмәгән урыннарда яки исерек хәлдә су керү белән бәйле,– ди Айдар Галиәкбәров.

БАРЛЫК ЯҢАЛЫКЛАРНЫ УКУ